eune matinée espéciale , le vendredi matin toujours

in avo nos marchands espéciaux et in savo du qui zétotent, d ailleurs si zétotent pas là, in éto contrarié , in meno l enquete "zavez pas vu untel ?"

yavo du monte dins ché zallées, et l' circulation ale éto pas facilitée car yavo souvint des embouteillaches, suffiso qui a tro matronnes qui s artrouvotent au coin d eune allée , avé leus cabas pleins et té devo rintrer tin vinte ou passer chacun tin tour pour éviter ch' gros bouchon là
pi pas la peine d' leu parler, ale zétotent in train d' discuter à 3, d' bin parler fort , à printe des nouvelles les zeunes des zautes, à raconter leu visites ach' méd'cin des mines, à comparer leur taux d' tension, à s' montrer leu bandaches qu ale zavotent aux gampes, et qu ale levotent les ziux au ciel d' eune maniere compatissante quand qu in dijo l' mot "ulcère" .......

yavo pas qu' ché femmes qu ale venotent au marché , yavo aussi ché zartraités, bin ouais fallo armonter ché courses, et au miyeu des années 60 tout l' monte y avo pas eune carette pour faire ché courses
par conte, si i déchindotent bin au marché, pour certains ché roles i zétotent bin définis, i déchindotent au marché avec ch' cadie à roulette, souvint avec un motif écossais rouche ou vert , i déchindotent au marché pour donner un coup d' main pour l' armonte, mais pas question d' suiffe grand mère dans ché allées, ou alors grante évolution , i zavotent eune liste d' courses à faire eux memes.......

cha a été eune révolution, pasque avant tout c'qui éto courses chéto uniqu'mint l' femme qu ale le faijo , mais j a parlé d évolution, mais jusqu à un certain point ,pasque savez et vous pouvez l' vire tous les jurs asteure, eune femme ale va passer BEAUCOUP PLUS d' temps qu in homme à faire ché courses...
donc ch' l homme quand qui avo fini ché courses, i allo l attinte au café , comme au coin d' la rue jules noyelles et del plache marmottant par exempe
ché là qui pouvo s in j'ter eune voir deux dins l' gosier,et pour certains d' commincher eune partie d' javelots dins ch' couloir près del cour intérieure ........

aprés soit qui sorto quand qui voyo arriver grand mère, mais chéto cor courant que grand mère ale rinte pour sin j'ter un pitit aussi, pasque l' marché cha usse ..........

(ché d ailleurs eune attitute que j' me souviens avoir vu aprés à mon cora, ché zhommes i faijotent pas trop ché courses, mais i zattindotent so dins ché carettes , pasque conduire ché garnoules d accord mais faire ché courses ah nan, ou alors i zattindotent derriere un d'mi dans l' café brasserie qui yavo dins l' galerie marchante)