Noel provençal

Dur dur quand qu in éto tchiot, vla l' début des vagances qui arriffent et l' derniere semaine avant Noel ........

Noel, cha ché un momint magique, j' vo l' tchiote qu on garde à l année al' mason , in 2 jours ale connaisso l' canchon du pitit papa noel, du que Tino Rossi i "loule" des "r" ...........

Indémodape Tino, grace à chte canchon, i est rintré dans l' cercle très fermé des canteux dont l' nom va passer , j'espère, les sièques à venir ....tout cha avec eune canchon bluette mais qui a su focaliser toutes ché zattintes des tchiots minloute

tiens , justemint ch' matin i m est arvénu un souv'nir d avant la Noel d' minloute
Savez que nos parints i zavottent du mérite ....... yavo pas des dessins animés du matin au soir et du soir au matin, et certains objets avotent eune importance bien différente qu asteure ...
j' pinse au tourne disque, meme si y arconno asteure un tchiot r'tour, pour mi plutot un effet d' mote qu aut' cosse d ailleurs ...
mais faut pas oublier que dans les années 60, le tourne disque chéto eune révolution comme l a pu l etre l' transistor ...
nous i trono sur un meupe expres , in meupe à roulettes, d'sus y avo un plateau in bo du qui avo l' plache pour l' tourne disque et sin couverque qu in poso à coté ,couverque du qui avo 2 hauts parleurs plachés l un à coté d' l' aute ...
in parlo pas cor de "stéréophonie" ...... in d'sous dech' plateau in bo, y avo un niveau du que té pouvo met' à plat des disques 33 tours et cor in d' sous t avo un espace plus grand du qui yavo d un coté ché 33 tours à plat pi un range 45 tours du que té pouvo classer vertical'mint tes 45 tours ...
quand que t éto tchiot chéto eune machine magique que l' tourne disque , ché pas ti qui avo drot d' l alleumer , ni d' canger la vitesse du tourne disque , ni cor moins l' drot ed' lever ch' bras et d' poser délicat'mint ch' bras pour que l' diamant i vienne en contaque avec ch' disque

chéto réservé à min père, et meme em' mère ale évito del faire pasqu i suffiso qu ale pose ch' bras trop loin alors l' canchon ale éto comminchée, ou alors trop au bord et ch' bras i arquéyo sul' coté du tourne disque et là t éto sur d intinte min père gueuler "assassin" ou "ché pas eune brouette" ou "ché comme cha qu in fout in l air ché diamants, té sait combien cha coute ?" (parait que j' su aussi soupe au lait qu' min père , j' confirme , m'femme ale m appelle "Léonce" sin prénom, quand que j' pars comme li in suchette)

Par conte si chéto min père qui poso ch' bras et que cha artombo sul' coté du tourne disque, d' abord t intindo "MERRRRRRRRRRRRRRRTE " et ché pas là qui fallo faire d' l' excès d' zèle in li dijant " té sait combien cha coute un diamant papa ?", nan , y a des chosses qui fallo pas faire, vallo miu faire l' autruche dins ché cas là ..........

Pour in arvenir à la Noel, pour passer ch' temps , pour nous calmer aussi, ouais pasqui parait qu in éto quequ' fos énervé, et que j éto étonné quand min père i rintro del permancence syndicale que m' mère ale l y disse que j avo pas été sache, pour mi j avo simplemint été enervé, et là j avo dro à m assir à coté d' li à coté d' sin bureau mais cha ché un aut' sujet à v'nir ...

donc j' avo dro pour m' calmer ou pour justemint que j' reste calme, j avo dro à acouter des belles histoires d' la noel, assis au coin du canapé , belles histoires qui sortotent comme par magie d eune galette noire et arliées par ché hauts parleurs
quand que j' dis assis au coin du canapé, chéto assis au coin du canapé, mi j auro voulu m assire au pied du meupe à tourne disque, j auro voulu rester debout et vire tourner ch' disque , m' mette à la hauteur pour vire ch' diamant poursuiffe s' course dins l' sillon du disque , essayer d' lire ,jusqu à l 'hypnosse c'qui éto marqué sur l étiquette du disque ou d' suiffe l' dessin du tchien Pathé Marconi tout l' temps quel' disque i tourno sur sin support .......... fallot pas y compter .........
nan j' étot trop brizaque, si in m' laisso assis à coté , j allo donner des coups dins l' meupe, si j' m approcho trop près du tourne disque parel , donc yavo comme un "périmete d' sécurité" du que j avo pas l' dro d approcher

bavard comme j' su, j a pas cor parler dech' disque sur l' Noel provençal , chéto pourtant l' sujet d' l histoire , bin tant pire , j' va faire la suite sur un aut' sujet

ché vrai qu'chetot magique chés electrophone , mi j'em rappelle qu'in n'da eu un , avec un pavillon , et pi j'em rappelle qu'ach' début d'el télé , ya un canteux , " j'cros " qu'etot aznavour , yavot enregisté d'su un rouleau , yavot des pointes , " ché ptête in connerie qu'ech'raconte la , mais j'ai cha d'vant mes yux ,
ché vrai qu'ché nouvieaux électrophones , ché in effet d'mote , mais quand in peut racouter ses 33 et 78 tours ché formidape