ché garnoules l hiver

j' vo inch' momint y a Jacques qui vient réguyer'mint sul' site , j a appris qui éto malate ... mi ni eune ni deusse, j y invo un mail hier ...
i m a répondu, j a sinti qui éto à l agonie, tout cha à causse des' n épousse, qu ale éto vraimint partageusse, quale avo attrapé des mi cropes et qu ale avo ardonné à Jacques des cropes intiers.........
in les conno tous , ché jamais d' leu faute quand qu ale sont malates, mais nous in a pas dro à l erreur, et si in a 41 d' fieffe et qui faut sortir l' bouleusse such' trottoir pour ch' passache des zéboueux , là "faudra pas s acouter", "pas faire d' chichis"

cha va pas les zimpecher, d' nous rhabiller physiqu'mint et moral'mint avant qu in met' l'nez dehors " viens chi , té cor rhabillé comme l as d' pique" , " ché pas la peine deut' couvrir et d' laisser tin cou à l air" ....etc etc etc ..

total , si tavo maux at' gorche et qu' t éto fébrile , in plus du coup d' fro que té pourro printe , té bon pour récupérer un mal d' tiete ......

pi bin sur, in mettant l' bouleusse such' trottoir, y a toudis un vigin qui li aussi met s' bouleusse, pi qui vient printe des nouvelles ....
nous , in va commincher à réciter not' litanie, expliquer quo qu in a eu, commint ché arrivé, l' appel dech' docteur, ouais l appel dech docteur qui est v'nu al' mason (pour qu in fache déplacer ch' docteur faut qu' cha so graffe, in va pas l' déringer pour rin )
in in éto à raconter ché premiers symptomes, in éto bin parti pour raconter l' suite , que l' porte del cuisine al' souffe et que grand mère ale crie "Jacques , rinte ichi tout d' suite , té malate" , à peine si ale vo ch' vigin qui est à coté d' li, ché à peine un bonjour, comme chi ch' vigin i avo pas vu qu' sin mari à elle i éto malate, et qui le laisso raconter s' vie "

in rintrant al' mason , teut' faijo ingueuler, l' femme ale diso " un vrai gamin, un vrai gamin qu' te fait, t as invie que j arfasse arvénir ch' méd'cin là comme t es ? " ...

ti t as bio essayer d' faire comme ché zinfants ,eut' disculper in dijant " ché pas dem' faute , ché ch' vigin, j arrivo pas à m in défaire" ..
mais grand mère ale est pas dupe , et ale fait fermer tin clapet
ah ale zin profite ché femmes dins ché momints d' grante maladie pour escusez me du terme, mais pour nous immerder quand qu in est presque , à l agonie ....