cartes publicitaires astra ou lesieur ?

chéto un temps du qu in éto pas toudis d'vant l' télé et que nous , ché jones , pour apprinte, pour éveiller not' curiosité, in avo ker des lives , comme par exemple , j' sais pas si vous vous souv'nez d' cha "le livre de la jeunesse", chéto plein d' tchiotes histoires et d' reportache sul progrès, su des pays, su des métiers etc etc

y avo aussi outre des cadeaux publicitaires instructifs, si si, cha a existé, j' sais bin qu asteure ché tchiots i tombe presque in nanition si i trouffent un magnete comme i dissent et qui vont l' coller such' frigo ..

mi j' me souviens d' cartes publicitaires, mais j' sero incapape d' vous dire si chéto Astra ou Lesieur qui faijo cha , in tout cas j in avo un paquet al' mason et cha m a vraimint instructionné

chéto des cartes qui expliquottent commint qu on récolto les principales denrées dans l' monte
sul' recto del carte té voyo eune arprésentation d' la récolte d' la plante et au verso i donnotent des explications sul' plante , quand que chéto récolté , du que chéto récolté, et à quoi cha servo

j' me souviens qui avo des cartes sur la récolte du thé , in voyo des femmes qui portotent ch' capio pointu asiatique , qui mettotent ché feules dans un grand sac in toile d' jute , commint qu on artiro la racine du manioc, la canne à sucre, la betteraffe, le sorgho, le blé etc etc

mi y en avo deusse que j a vo ker chéto l arachide, j arrivo pas à comprinte qu eune plante qu ale pousso au sol dans eune espéce d' sabe, ou d'terre assez pauvre, cha pouvo d' venir aprés notre huile
(chéto l époque que l huile ale éto souvint d arachide, avant que l' huile d' tournesol cha s' developpe )

outre l arachide, chéto l' poivrier qui m'interpello, d' vire un arpe comme cha qu in cueillo ses tchiotes boules rouches pour n' in faire des grains , j éto surpris, j' imagino que les graines du poivrier chéto sur eune toute tchiote plante

in tout cas pouvez armarquer que plus d '40 ans après , j' me souviens cor d' ché cartes là, et pourtant y a longtimps que j in a pas vu , preuve qui pouvotent et qu in peut créer des supports publicitaires instructifs
quoi que ché pu l' but des publicitaires d ' nous instructionner, i s'rotent plutot à essayer d' nous abrutir , pour qu in busie moins et qu in acate cor plus ....