Rachènes...

Un jour, alors qu' j'étos armonté dins min Nord natal, j'a eu invie d'arvire el' mason d' mes grands-parints à Grenay. J'tos un tiot peu ingoissé, car ch' tot el' première fos qu' j'y artournos in sachant qu' cha s' rot des neuviaux habitints que j' trouv'ros là.
Arrivé sur plache, pris par l'émotion, j'a pas su m'arrêter tout d'suite et pour causse, y avot plein d'monte déhors et même un gosse qui juot su ch' perron. Ej' vous prie d'croire qu' cha fait vraimint bizarre...
Un tour, pis un aute, enfin, i fallot bein que j' m'arrête un jour ! Ch'est choque j'a fait un peu pus loin. J'a garé m' carette dins l' rue vosine, pis j'a continué à pattes.
Mais rein à faire, y avot toudis autant d' monte au 5 rue Nungesser. Alors, je m'suis rabattu su l' mason de ch' visin. Alle étot inoccupée apparemmint.
Comme ech' gardin i étot lipe d'accès, je m'suis permis d'intrer comme cha discrèt'mint, em' n'eul su l' maison de m'n'infance et m' n'orelle à l'affut.
J'étos là, plinté au milieu d'un gardin duqu' j'avos jué des heures et des heures vecque min frère, mes cousines... Deuxième momint d' solitude.

Pis, i fallot bein pinser à déguerpir, in n' sait jamais... Alors, j'a voulu rapporter vecque mi un souv'nir. A côté de ch' noyer d'ssous l'quel in faijot nou cabanes, i avot des pousses, des jeunes apes quoi. Un tiot effort pus loin et ch' tiot noyer i étot dins m' main. Et comme ch' tot l'saison des z'arplintaches, je m' suis dit, ch'tilale, je l' ramènerai dins min neuviau pays, in Charinte.
Et ch'est comme cha, qu' ein plus ed' mes sacs ed' voyache, ej' m'as artreuvé dins ch' train vecque ech' tiot ape vecque mi. Chés autes voïageurs i m' ravisott'nt bizarr'mint !

Arrivé à m' mason. Ni une, ni deux, ech' trou y a été vite creusé. Et m' n'ape vite mis in terre. Dès l' lend'main et tous chés jours suivints, j'allos rinte eun' tiote visite à m' n'ape. J' voulos mi l' croire, mais i fallot s' faire eun' raison, i étot in train d' dépérir ech' paufe...
Direction el' coopératife pou mi comprinte : j'avos ein camarate qui travaillot là et i m'a tout d'suite parlé d'ein problème d'acclimatation. Commint cha ? Et bein, té sais, un ape, ch'est comme nous autes, té l' canges ed' plache sans y d'minder s' n'avis et y a pas trop querre.
Là-d'ssus, j' rinte à m' mason, j' tinte tous chés remètes ed' min camarate. Chés jours y pass'nt, et malheureus'mint, rein n'avot marché. Min noyer, i perdot ses feules eun' à eun', et s' n'écorce alle dépérissot.
Alors, m'a v'nue eun' idée d' diape.
J'ai tinté el' tout pour l' tout. J'a fait caufé dins eun' cas'trole de l'iau vecque un bout d' carbon de m' collection. Ein' fos arfrodie, j'a versé direct'mint cheule solution à ch' pied ed' min noyer, in espérant qu' cha marche...
Aujourd'hui, après l' tour quotidien dins min gardin, ej' cros bein qu' min ape i va donner ses premières noix ech' t'année. Comme quoi !
Alors, vous l'avez tertous compris, cha a marché. Du jus d'carbon à chés rachènes et hop!

Soudain'mint j'arpinse à choqu'i m' dijot min camarate de l' coopératife sur l' dérachein'mint. Mi, j'a pas invie de m' plainte, mais faut arconnaîte, qu' mes rachènes alle sont pas à l'aise dins l' tierre à truffes...

Quelle belle histoire, même le petit arbre regrettait son Nord

oui ch'est eune très belle histoire et ch'est là qu'in s'dit que les terres des corons étotent bien imprégnées ed poussière ed carbon
In tout cas t'as eu eune idée ed génie ed pinser à faire cha, té vas bien les apprécier tes gauques

trés trés belle histoire qu' ale m a touché, j' me suis vu at' plache

j' la rajouté dins "nos histoires préférées"