ch' buffet d' mononque Maurice

chéto l' buffet que j a toudis connu al' mason, un modèle unique pisque chéto du temps du que cha s' faijo pas cor à la chaine
mes parints i zavotent fait faire eune tape à rallonches, et un buffet par mononque Maurice
Par conte quand qu in arrivo à in parler , chéto toudis l' meme rengaine " ché du solite, mais Mononque Maurice i nous za pas fait d' prix"

Mononque Maurice i faijo parti del famile chéto en fait pour mi un grand oncle, i éto menuisier d' profession

ptete que cha leur avo paru cher, mais in tout cas chéto du solite pasque j' vous raconte pas l' nompe d' coups qu in a du ouvrer et arfermer ché tiroirs et ché portes du buffet

allez j' va faire un calcul, in va dire qu in ouvro au moins 3 tiroirs au matin, 3 à midi , 3 au soir, ouvrir et arfermer cha fait 18 maneuves par jour , donc avec eune moyenne d' 330 jurs par an, zavez vu j' su larche cha fero plus 5900 ouvertures d' portes par an
asteure comme i do dater d' 1949 , cha veut dire qui a servi durant 52 ans, j' vous fais l' calcul cha fait 306800 ouvertures d' portes ....
tout cha pour vous dire qui a tenu l' coup ...et ché pas cor fini am' mote qui do avoir eune nouvelle vie , vu qui a parti à mon Emmaus ...

bin si y peut cor faire l' bonheur d' quéqu un , ché bien ,par conte j' su déçu, i saura que chéto mon Mononque Maurice qui l avo fabriqué d' ses mains ...

zallez dire ché un buffet comme un aute, attindez attindez, in va et' un peu curieux , in va in drecher l inventaire

porte in haut à gauche, ché ch' tiroir qui servo l' plus ...chéto chti du qui avo à la fois ché verres qu in utiliso régulier'mint plus l' boite in fer du qu' min père i metto ses médicamints à printe chaque jour , et comme i diso quand que j' l imbeto in dijant qui commincho à nous couter cher avec ses médicamints al' sécurité sociale , i dijo toudis " éh mi j a comminché à travailler à 13 ans mi" ....

l' porte du miyeu chéto eune porte qu in ouvro moyen'nimt vu que là in trouvo cor des verres et un peu d' tasses

l'porte d' droite in haut chéto là du que m' mère ale metto sin beurre pour qui so facile à tartiner such' pain coupé , yavo aussi l' sucrier avec s' pince et ché tasses d' café ....

in d' sous à gauche avant chéto l' niche d' min père, à droite chéto l' niche dem' mère, pi rapid'mint , j a hérité del niche d' droite , (j' vous raconte pas l' fouillis qui yavo d'dins)

ensuite su la gauche , voyez 2 grands tiroirs, interdit d' les zouvrir, chti du haut chéto chti d' min père , chti du bas chto chti dem' mere, ché là qui mettotent leu montres,in tchiot peu d' papier , pi l' portefeule pour m' mère

sul' droite l' porte rectangulaire, ché là que m' mère ale metto dinch' temps les couverts, pi quand que cha a été dur d déchinte al' caffe , ale metto là des boites d' conserffes, des pates etc ...

ché placards du bas, chéto d ' abord des rang'mints à saladier, à corbele à pain , à serviettes avec leu ronds, ché plats
cor qui faut préciser ché plats ordinaires, pasque l' batterie d' plats in inosque ale éto dinch' buffet d' la pieche d' devant , du qui yavo aussi rangées précieus'mint ché ménagères guy degrenne et companies qu in sorto que dans les grantes occasions

asteure pour vous réhabiliter mon Mononque Maurice, faut vanter sin traval, quand qui a fallu démonter ch' buffet in s a dit qu in allo in tchier ,et là in s a aperçu in l' bougeant un peu qu in fait, précurseur ou tout au moins astucieux, l' bas et le haut étotent simplement réunis par 2 barres d' bos vissées intre elles

l seule difficulté cha a été d artrouver un tchiot tournevis à tete plate, vu que cha fait eune trentaine d années qu in jure pu que par l' cruciforme ...

mais ché pas tout ...quand qu in a soul'vé ch' meupe in pinso in tchier, bin nan, chéto très léger, in fait chéto à la fois solite vu qui a tenu plus d' 50ans sans probleme mais aussi léger pour l' manipuler

alors j el dit merci Mononque Maurice ...