ch' pot d 'colle

savez j' comprinds pourquo que j éto tel' mint bon à l école que si in m avo poussé un tchiot peu ..j' s'ro quéu dins ch' brin comme in dijo

ché en écrivant l' sujet su la poésie que cha m a arvénu, ch' fameux pot d' colle

asteure que j' su grand , j' su sur que j su in ache d ' comprinte un grand mystère dem' n infance et j' compte sur vous pour m expliquer cha .......

pourquoi que mi j arrivo pas à avoir eune trousse d école bin rangée ? pourquoi que chéto toudis à mi qui arrivo des zhistoires avec ché pots d' colle?

as' deminder si j éto pas maudit ......

mes pitits zinfants asseyez vous autour du grand fauteul à papy minloute i va vous raconter eune histoire du temps qu in utiliso des pots d' colle in classe

j' vo bin qu' vous faites des ziux d' merlans frits, que pour vous la colle ché pas un probleme vu qu asteure tout y est en "stick" comme vous dites, en baton , comme ché batons d' rouches à leves si vous préférez

meme qu asteure l' colle ale est rose du que t as collé , aprés ale arvient transparente, mais ché pour que quand vous comminchez à coller vous pouvez toudis savoir c' qui est incollé ou pas

nouzautes in avo pas cha, pi faut dire que j' devo et' dégourdi, faut dire que j a été longtimps avant d' savoir faire mes lachets d' godasse, meme qu asteure j' deminte cor à grand mère ....nan là j exagère

mais ché vrai que j avo deux mains gauches, ou alors expliquez me pourquoi i m arrivo toudis des histoires avec l' pot d' colle
pasque chéto pas si facile qu' cha à utiliser

commint cha s' présinto, chéto eune tchiote boite cylindrique avec un couverque , quand que té soul'vo l' couverque t avo au miyeu un indrot du qu' té ringeo l' tchiote pelle in plastique qui servo à étaler la colle, et , tout autour dech' tchiot récipient cylindrique du qui yavo l' pelle, y avo l' colle tout autour

mais zallez dire , cha s étalo avec l' pelle ? OUAIS mes gins , alors fallo pas n in printe d'trop sinan té faijo un trop gros paté d' sous l' feule que té voulo coller

pi i suffiso qu' t in mette in tchiot peu d' trop , cha séquo in faijant eune surépaisseur, cha rindo souvint illisipe l'encre du polycopié d' la poésie que ch' maite i vo donné à coller

aute danger si te metto trop d' colle, ché que quand que t arfermo tin cahier, pour pas qui a d' surépaisseur que té voyo bin que chéto parti pour en' n avoir eune, t appuyo d' toutes tes forches sur tin cahier pour l' rinte l' plus plat possipe
cha rato pas, quand qu in fin d' semaine t arsorto tin cahier d' poésie et qu ' té voulo ouvrer l' pache du qui avo l' poéme, té t artrouvo d' léque pasque ché paches ale zétotent collées insempe
alors là fallo vire directemint t' mère , meme si teut' faijo ingueuler, pasqu à forche d' patience, ale zin ont ché manmans, ale arrivo à décoler ché paches tant bien que mal
j' diro plutot bien que mal, pasque j avo essayé un coup d' faire cha dins min coin, j avo arrivé à couper l' feule del pache d' gauche au miyeu, que meme l' récitation du dernier coup ale éto coupée in deux

alors là cha avo gueulé, un coup al' mason, pasque impossipe à rouvrir ch' poème, j avo du aller ché min camarate Joel pour arcopier ch' poème pour l apprinte ....

bin sur , à l école, l' jur qu in avo poésie , ch' maite y a passé dins ché rangs et quand qui a vu que chéto pas sin polycopié mais que j avo arcopié à la main, y a fallu que j l y explique commint la colle, ennemie insidieusse, ale avo d' elle meme, à l insu d' min plein gré comme diro un cycliste célépe , commint qu ale s éto étalée partout sans que cha so dem' faute ....

quand que j a vu que ch' maite i croyo pas am' version, j a tenté un "j' les pas fait exprès" , c' qui ma valu d' abord eune bargnouffe, et qui m a dit "cor heureux" et qu in deuxieme lieu, j a été interrogé sur chte fameusse poésie, que si j' la savo pas j allo passer un sacré quart d heure

mais savez faut accroire un tchiot peu au bon dieu, ou tout au moins à un esprit divin, ou ptete à forche d' l avoir arcopié , eune fo sur eune feule, eune fo sur min cahier , pi d avoir du l' réciter correctemint am' mère, bin j'el savo par coeur

avec quand meme un peu l appréhension d' pu la savoir, mais quand que j' su arrivé à la fin et que j a dit l' nom d' l auteur "Maurice Careme" , j' savo que cha chéto bin passé, d ailleurs ch' maite i s a levé tout d' suite , pi i m a ravisé à nouveau in dijant "cor heureux qu' tel' savo" , ouf que j a dit eune fo qui a eu l' dos tourné pour artourner virer intre ché pupitres in criant d eune vox de stantor "in n a d ' autes qui ont collé n importe commint ?"
et là i attindo pas l' réponse , i arprenno tous ché cahiers et j' me souviens qui avo min camarate Dieval, que chéto pire qu' mi, d abord au niveau del tentative d' récupération del feule, mais surtout au niveau del recitation qu a du essayer d' anonner à ch' maite

bin sur y a eu eune punition, i m a qué sul' pal'teau al' récréation pasque chéto à cause d' mi qui avo des lines à arcopier, tout cha paraphé par l' signature des deux parints ...

mais y avo pas qu' cha comme inconvénient avec l' colle in pot, suffiso d' pas bin arfermer ch' couverque , ou plutot d' faire cha d eune main tout in ravisant sin copain Philippe faire ch' con, bin ch' couverque i resto un peu ouvert et là l' colle quand que té rouvro ch' pot ale éto séque
cha chéto interdit, et là fallo pas s' faire printe nan pu par ch' maite, tenter eune approche discrete avec sin vigin , ou chti qui éto d' vant ti pour qui veule bien t' passer sin pot d' colle tout in s' faijant pas attraper nan plus, pasque si ch' maite i voyo qu in passo s' colle à un aute, tous les deux in éto puni

yavo des fayots , des peureux, qui faijotent exprès d' murmurer assez fort "NAN" pour que ch' maite i l intinte, i s artourno et i d'mindo à untel pourquo i avo dit nan, et l' aute , avec s' voix d' fausset, près à braire i dijo , "y voulo que j' li prete m' colle" , alors là trahison complete, punition, mis au coin

in intindo un tchiot peu d' temps in éto pas fou, pi ch' fayot i s' méfio d' nous durant les récréations suivantes , i resto pas loin d' ché maites

mais in s arringeo dans la semaine , à plusieurs bin sur , pour l' coincher dans un coin et d' li filer un bon coup pied dins ses tibias

"UN BON OUVRIER CHE CHTI QUI A DE BONS OUTILS " ah combien d' coups qu in a pu intinte cha in primaire ...

aute cas aussi , et cha j éto un espécialiste, comme l' traval manuel et mi cha faijo chinq, au moins .... dés que ch' maite i dijo "ringez vos cahiers, ringez vos zaffaires" , mi j éto attiré comme un electro aimant vers l' porte d' sortie , donc j arfermo ch' pot d' colle in vitesse, sans bin raviser si chéto bien freumé, cha l éto pas souvint ,sans parler d' tous les coups que j' laisso l' pelle in plastique au beau miyeu del colle et là t avo le double effet quissecoule quand té rouvro l' boite , el' colle ale éto séque et ch' baton d' colle i éto fixé au miyeu comme si chéto du béton

aute cosse, aussi, aut' danger , mais là chéto aussi lié am' précipitation quand que chéto la fin des travaux manuels, chéto d arfermer ch' pot d' colle , mais in faijant pas attintion ché à dire en laissant del colle sul' pas d' vis, et là parel , quand que té devo rouvrir ch' pot, là t avo pas l air d un con, en essayant d acceder al' colle qui yavo à l intérieur, alors qu asteure ch' bouchon té pouvo t exciter comme té voulo, et cor fallo pas s' faire attraper par ch' maite, mais t arrivo pu à l ouvrir
après l' tchiote pelle ale m ouvro des idées de balistique, te prenno un viu buvard , tin faijo des toutes tchiotes boules ,et tet' servo del tchiote pelle comme eune catapulte

pas si facile qu' cha mes gins pasque si té serro trop fort l' tchiot manche, l' pelle as' casso in deux, ou si té serro pas assez fort, ché l' tchiote pelle qu ale parto en avant , tout cha en espérant que ch' maite i le vo pas et qui l intinte pas
aprés t avo la hantisse quand qui passo dans les rangs qui trouve li meme l' fameusse pelle, et là t avo dro à "qui ch est qui a lancé s' pelle?" fallo réponte tout de suite, bafouiller eune escuse quite à s' faire ingueuler , pasque si in répondo pas, in vo dro à devoir tous li présenter sin pot d' colle et l' pelle qui allo avec