Au Renard Bleu ou Matantemarie la suite

in na qui vont s'dire mais pourquoi qui nous parle du Renard Bleu alors qui a parlé pratiqu'mint que d' mononctaf et matantemarie

pasque cor un coup j' su parti en "hors sujet" , au gré d' em' n inspiration du momint ......

donc j' arviens au Renard Bleu et zallez comprinte ....

j avo 6 ou 8 ans, et j avo pas trop ker Matantemarie ...ale avo pas eu d infants, et am' mote que cha la déringeo pas ......

yavo toudis eune distance entre elle et nous......

j' dis pas qu in avo pas eune belle dringuelle à la noel , et m' mère chaque année un plat in inosque

ché plats in inosque ....
qu à la fin in auro pu arconstituer eune bataille d' vikings vu l' nompe d'plats qui arsemblotent à des boucliers qui venotent s intasser chaque année dins l' bas du buffet del pieche d' devant ....

donc quand qui yavo des réunions d' famile ,Matantemarie ale metto sin bio manteau, sin bio manteau qui m' faijo peur

chéto un mantiau que j' pourro pas vous ardire l' couleur et l' forme d' ché boutons, mais ché l' col que j' me souveno très bien .....

chéto in col in fourrure, zallez dire in col in fourrure cha fait pas peur

bin si pasque chéto comme si ale avo un animal autour du cou, té voyo l' tiete d un coté , et les pattes d' l aute coté

alors imaginez vous infant, l ' arrivée del Tantemarie, que j' craigno plutot qu aute cosse, avec ses gants noirs , sin "parfum d' vielle", ah ouais un parfum l' moins qu on puisse dire ché qui éto "tenace" , à tin faire braire ... et sin fameux mantio ...

et l' pire ché quand qu as' pincho vers ti pour t imbrasser, ché pattes et l' tiete ale ballo vers ti, comme si ch' l animal i éto cor vivant et qui allo t' morte

j 'sais pu quo qu' chéto comme animal, j' auro dit mais ché pas cha, comme un loup
mais cha peut et' cha, chéto plus pitit ......

m' grand mère ale avo ker ch' mantio là, et à chaque fos, chéto un sujet d' conversation quand qui yavo ché repas in hiver, à noel ou al' nouvel année ...

cha devo et' un mantiau espécial, j' vous dis cha avec m' vision d infant, pasque ch' mantiau là et ché cha qui m' simblo extraordinaire, matantemarie ale le gardo pas as' mason, chéto trop fragile

alors ché cha qui m' simblo bizarre, sin mantiau à elle, ale le laisso au magasin "au Renard Bleu" et quand qu ale in avo besoin , ale s' el faijo livrer as' mason, et aprés les fetes i arparto ach' magasin ......

et pi quand qu in est tchiot in a ker les zanimaux, in ravisse Colargol , Saturnin al' télé , et vlà ti pas qu in vo s' tantemarie , avec eune bete crévée autour d' sin cou ......

j' m éto demindé au départ , si chéto pas elle qui l avo attrapé et qui l avo installé su sin col d' mantiau

zallez dire que j'divague, mais voyez , matantemarie ale avo des kiens que chéto comme des spitz, comme des loulous voyez ...

et cha arsemblo etrang'mint à l animal qu ale avo in fourrure autour du cou
et j avo en fait eune vision d'elle comme "Cruella", savez dinch' dessin animé de oualtedisné , "les 101 dalmatiens" dont in voyo au compte gouttes des zestraits dans l 'émission de Pierre Tchiernia " l ami public numéro 1".......

j' me dis à l instant qu un tchiot encart publicitaire sur un programme d' cinéma, cha m a fait arsouv'nir des chosses que j' me souv'no pu si bien qu' cha ......

pour mi avec m'tante Paula, al avot einne bete comme cha aussi autour ed'sin cou , ché vrai que quand al voulot m'imbrasser , ej voyos ech museau pointu qui s'avinchot sur mi...
Commint qu'al pouvot s'promner avec ech truc là à sin coup , j'ai 60 ans asteur et j'ai pas core compris.

Merci quand meme , minloute , pour ech'souvnir peu plaisant...

El bete autour du cou c'est un renard c'était la mode , il y avait aussi des manteaux et vestes en mouton doré c'était le grand sanding

Le magasin "Au renard bleu" était tenu par Mr PLOMION qui avait une fille qui s'appelait Thérèse qui a habité rue des Fauvettes dont le mari s'appelait Claude Salengro surnommé "Cravate" car il vendait des cravates sur les marchés (pour ceux qui s'en souviennent) .

Pour el col in fourrure y avot aussi dins ches époques là el mode du col in putois , là ché eune tout tiote tête et y avot les pattes au bout, paufes bêtes ... quelqu'un d'em famille avot cha, j'cros que pas gramin d'femmes oserotent mette cha aujourd'hui