la fin des galeries premier pisote

ah j'vous vois djà vous dire, cha y est in va cor arparler del fermeture d' ché puits d' mine .............

bin nan mes gins, in va parler d' eune habitute qu ale presque disparue in tout cas grinmint diminuée, chéto l' galerie qu in metto su ché carettes

in in éto fier d' cha, j' me souviens min père quand qui dijo "in va sortir l' galerie " , in sinto qui éto contint .....

nous nan, asteure connaissez bin commint qui réagisso min père, in est aussi patient l' un qu' l aute..........

alors in savo que l' installation d' la galerie chéto un cas du qui pouvo cor facil'mint s' enerver et nous ingueuler pasque cha allo pas assez vite à l' mette in plache

chéto mi qui éto d' corvée pour l installer avec li sul' carette, chéto d ailleurs in modele assez lourd, sur les deux barres éto soudé ou boulonné un chassis complet, avec in plus in rebord tout autour pour empecher qu' ché valisses ale foutent l' camp quand qu in roulo ...

cha chéto cor eune aute histoire mais n anticipo pas ..........

autant à l époque ,l'armorque chéto plutot considéré presque comme eune bétayère , autant cha faijo "classe" d' avoir cha sul' toit del carette

chéto signe qu in parto en vagances ...... j éto pas peu fier quand qui fallo l installer such' toit del' carette, meme si j' connaisso à la longue les danges qui fallo éviter ...

l' premier chéto d' rayer l' carette in passant l' galerie par dessus ch'toit ....

jesus marie joseph, si t avo l' malheur d' pas bin t'nir l' galerie et qu ale touche ch' toit un peu fort, ché comme chi té brulo min père au fer rouche ...........i gueulo....avec bin seur s' n expression favorite "ché pas eune brouette"

d' ailleurs j a jamais bin compris ch' te phrase, pourquoi qu in s' ro brute avec eune brouette ?

mais arvenons al' galerie, pour l' poser such' toit, ou plutot pour que ché zattaches al' tompent bien d' chaque coté del carette dins ché rainures du toit , in preno l' galerie, j allo dire l instrumint d' torture.....

j'eum placho avec min père d'vant l'capot del carette , pi d' chaque coté comme un brancard quand qui les carquent dins ché zambulances, in passo l' galerie complète au d' sus dech' capot

momint critique que j a jamais osé imaginé commint que cha auro fini si j' l avo fait querre ach' momint là, quand qu in passo au d' sus del vit' del carette, d ailleurs in intindo à chaque coup min père dire "attintion al' vitre" , t' inquiete papa, in l' savo ....té nous l avo assez répété .....

plus facile à faire pour min père que pour mi, vu qui éto plus grand qu' mi ..enfin in y arrivo ,mais j' savo qui fallo raviser d' chaque coté que ché deux attaches ale soient bin parallèles au d' sus del rainure avant del poser ...

et cor , fallo attinte l 'orde donné par min père ...

j' vous vo d' ichi d'puis taleure qui a eune question qu ale vous taraute ...pourquoi ché pas manman qu ale donne un coup d' main à papa pour met' l' galerie ?

Acoutez mes zinfants, zavez pas connu l' état d' excitation, avec du recul, j' diro d' l anxiété , qui avo min père quand qu in parto pour faire un grand voyache in carette

donc ach' momint là i éto pas à printe avec des pincettes ...et si chéto m' mère qu ale li auro donné un coup d' main cha finisso toudis del meme façon ...

m' mère quant à elle ale chomo pas , ale finisso d' préparer ché cartons , alors si min père i li avo d' mindé un coup d' main ach' momint là , cha la perturbo

cha la perturbo au point qu ale arrivo à faire des noeuds avec ses bras quand qu ale commincho à soul' ver l' galerie pour l' mette in plache sul' toit....
sans parler qu ale éto prete à partir à gauche quand qui fallo partir à droite
cha faijo qu' min père i s énervo, et que m' mère al' brayo ....
et qu' après i éto l' premier imbété quand qui voyo manman pleurer ....


faut dire aussi, qu' eune fos l' galerie fixée aux quat' coins, commincho l' carquach' del' carette et que m' mère, meme si intertemps ale avo été monopolisée par min père pour mette l' galerie, ale avo interet dins l' mineute aprés que ché cartons , ché valisses , que tout soit pret pour commincher à tout carquer ....

in metto l' galerie j' dijo , pour ché grands voyaches ...

un grand voyache cha commincho déjà quand qu in parto pour Merlimont en vagances ........

m' fierté chéto que quand qu in metto l' galerie sul' carette, chéto signe qu in allo partir en vagances

d' ailleurs ché gins del rue i s' génotent pas, de d'minder du qu in allo ... et min père i éto tout fier d' réponde

in fait min père y a comminché à vraimint voyager quand qui a eu s' retraite à 55 ans, qui v'no tout juste d' passer sin permis , pi d acater eune 403 break peugeot d' occasion...