l' boite d' cassoulet
par minloute le, 26/05/2011pour mi l' boite d' cassoulet, chéto associé à un bon souv'nir, ch est quand qu in allo à not' chalet à merlimont ...
chéto un chalet en préfabriqué, acaté à mon Leroy Merlin qui répondo au slogan publicitaire "heureux comme un roy , dans un chalet Leroy" ....
tout un programme
in y allo passer plus d' un mo en vagances l été, faut dire aussi que mi j a surtout connu min père quand qui éto al' retraite, j avo 6 ans quand qui a quitté les HBNPC ...
mais in y allo aussi à Merlimont eune paire d' jours à Paques , au grand dam d' em mère, qui avo pas ker mais alors pas ker y passer la nuit
autant m' mère ale y allo j' diro pas à arculons, mais bon , ale avo ker s' mason et sin confort , autant min père si cha avo tenu qu à li, in y auro passé j' cro bin cor plus d' temps
j' vous a raconté dans un artique précédent, l' déroul'mint des préparatifs pour carquer l' carette, ché derniers sacs que m' mère ale ram'no à min père alors qu elle y avo dit chinq mineutes avant qui avo pu rin à carquer .....
sans oublier qui fallo presque qu ale saute dins l' carette en marche quand que, enfin, ch' dernier sac y avo trouvé s' plache dins l' coffe del 403 ...
ch' voyache ,tout parel , j' vous l a djà raconté, sortie d' Bruay, Ourton, Dieval, l' grante line droite pour arriver à Brias, (attintion à ché rals del line d' k'min d' fer) , Saint Pol et s' cuvette pi aprés ché grantes routes pour aller jusqu à Hesdin
d' là , in passo par Marconne , Marconnelle, pi in rattrapo Campagne les Hesdin, ou alors in passo par l' bas, tout cha pour arriver à Montreuil
d' Montreuil, là j commincho à bouillir, l' tout chéto d' vire au loin en premier ché dunes
ensuite Sorrus, St josse ou St Aubin, t avo l' choix des saints ...
tout cha pour arriver à Merlimont village , cor quequ' virages et aprés chéto l' lonque line droite pour arriver à Merlimont Plache
faut dire aussi , j' sais pas si cha s' est amélioré, mais j' me souviens d' séjours à Paques, du que m'mère , quand qu in arrivo au niveau del derniere grante line droite , ale commincho à s' lamenter
chéto du ginre " mais t as vu ch' temps, in va rester au chalet " , "oh i do faire cor bin frod , y a du vint", " t as vu y a pas cor d' volets ouverts par ichi", " j espère que l' boulangerie ale est ouverte" "y a cor grinmint d' sape au miyeu del rue "
autant min père au volant i sorto des "vannes" pour s' moquer d' em mère , "ché vrai Odette, j' viens d' vire passer un ours blanc", ou alors "j' espère qui auro pas d' tempete d' sape et qu in s' artrouffe coinchés ichi eune quinzaine d' jurs " ....
cha faijo cor sourire m' mère, et mi, à l arriere del carette, j' téno pu assis , tel'mint j éto contint d artrouver Merlimont
in garo l' carette d' vant l' tchiot portail in ferale bin rouillé, faut dire qu au bord d' la mer , tout c'qui éto férale, cha souffro vraimint , cha obligeo min père à arpeinte ch' portal et l' barriere au moins tous les deux ans
mi c' qui m' énervo toudis, ché que autant ch' portal, si in peut appeler cha un portal d ailleurs, i éto pas haut, té l enjambo sans souci, i devo faire , allez maxi 50 cm d' hauteur ...
autant min père i avo mi eune fichelle avec des noeuds et des noeuds, et cha preno un temps fou à ouvrer
et allez pas vous amuser à dire à min père "print un coutiau ou eune paire d' ciseaux et coupe cha " ...malheureux ....
t avo d' vant ti un magasinier, que dis je , chef magasinier en r'traite, qui , pour li , y éto pas question d' gaspillache ..
rin qu ' a pinser qu in auro pu couper eune fichelle, et qu in l auro j'ter aprés ...chéto un crime d' lése majesté
faut dire aussi que l' fichelle qui avo utilisé pour freumer ch' portal, chéto pas djà du neuf, chéto souvint del récupération d' eune fichelle d' colis , du qui avo djà fait des noeuds pour en garder l' longueur originelle ......
eune anecdote , un coup in voulo li donner un coup d' main, i avo décidé d' faire un coup d'rang'mint dans s' cabane qui avo à Merlimont ...
yavo j' vous mints pas, des clous, que pour mi si in les avo daté au carbone 14 ,j' me d'minte si i daterotent pas du temps d' Jésus et d' sa crucifixtion ..........
avec l air marin, et l' fait aussi d' les avoir un "tchiot peu" oubliés, ché clous i s étotent rouillés, vous m' direz, cha arriffe, mais pire i s étotent amalgamés ...
véridique, et allez pas li dire qui fallo jetter cha, i vous désarmot in dijant "j' garde cha, cha peut servir....."
donc nous zarvla d'vant ch' portal, min père dehors tout d abord tout contint d' artirer l' fichelle, pi aprés i voyo qui s énervo, in avo dro à 2 ou 3 "merte" ...
nous in savo , c' qui fallo faire, en fait rien ...... m' mère ale resto assisse dins l' carette, stoique, meme si cha faijo un momint qu ale avo invie d' faire pipi...et mi l' tiete penchée entre ché deux fauteuls d' devant, j éto in train d encourager mental'mint min père
j' a dit "mental'mint" , fallo pas s amuser à sortir eut'tiete par l' portiere et li dire " ché cor long ?" ou pire encore si chéto m' mère qui oso li d' minder des' voix toute douce " t y arriffe ?"
min diu mes gins...j el connaisso l' réponse à " t y arriffe" ....chéto " té cro que j' m amusse" ou pire" t as pas eune paire de ciseaux " comme si m' mère ale avo sur elle eune panoplie d' armes et d objets pointus , comme ché tortues nineja ....
j' vous rassure, ché ciseaux chéto pon pour couper l' fichelle, chéto pour essayer d introduire l' bout del lame del paire d' ciseaux entre ché noeuds qui avo super bin fait l année précédente
cha arrivo meme qu on intinte " mais quel con" , là y s adresso à li, à ché noeuds d' malate qui avo fait l année derniere, alors que j' vous rappelle que m'mère ale avo invie d' aller faire pipi , et que mi j' auro pu passer au d' sus du portal, rin qu en l' vant l' gampe