ch' camembert d' Verton

j' m' arvo al' fin du r'pas, prop' comme un sou neuf dins min pyjama qui sinto bon l' lessiffe, les caveux cor un tchiot peu fraique mais bin peignés avec l' raie sul' coté ....

au pied , les chaussons, in éto samedi soir ...... tout l' monte y avo pris sin bain dins l' cuisine, d' abord m' mère dins l' bassine jaune, pi aprés mi, pi enfin mon père mais li chéto dins s' bassine rectangulaire in férale ....

toute l io ale éto récupérée et min père i arroso ch' gardin avec cha d ' ailleurs .....

in éto à la fin du r'pas, j' devo avoir un chausson qui devo et' tombé à terre, ché rin jel ramasserai quand que j va m' lever
mais pour l instant ché l heure du fromache ...........

alors là, in est au début des années 70, 1970 j' précisse pour ché moqueux d' gins, et bin in n avo pas autant d' choix d' fromaches qu asteure ......

j' parle du choix courant, cha s' limito à un camembert, un gruyère, ( in parlo pas cor d emmental), eune mimolette, un chévre et ché à peu près toute , j' parle bin sur du choix courant ....

cor que comme j avo dis dans un précédent artique, chéto l' époque du que té pouvo cor choisir tin fromache, j' parle surtout du camembert, pasque d' l un à l aute, tout in restant dans l'meme marque , té pouvo in trouver des jeunes, des platreux, pi certains qui courotent après l' boite ....

asteure j' sais pas pourquoi in tate cor ché camemberts pasque asteure ché tel' mint pasteurisé, industrialisé, aseptisé, que t as pu d' surprisses, ché toudis l' meme fromache que té va trouver sous sin papier d' emballache ....

j' me souviens , in éto en hiver, l' jour i éto parti d' puis un momint, yavo del pleuffe qui quéyo su ché vitres, et m' mère ale rapporto ch' plateau d' fromache

l' temps comme min moral i devo pas et' au beau fixe, et savez , et souvint in s in aperçoit bin plus tard, nos manmans ale zavotent toudis l' mot ou l' bonne expression pour nous faire sortir d' not' mélancolie

j' me souviens qu ale m avo coupé un morciau d' camembert, camembert acaté à la coopératiffe, et qu ame faijo voyager , tout in m' montrant l' imache qui avo such' couverque

chéto un camembert fabriqué à Verton , té sais du qu' ché Verton minloute ?
Nan que j' répondo
Pourtant té devro connaite ché pas loin d un coin que t as ker aller qu' ale m' dijo m' mère ...

j' cacho un momint pi am' dijo, pasque j' trouvo pas l' solution, ravisse pas l' vaque au premier plan, mais quo qui a dinch' fond ?

Là in voyo un batio à voile , et là j' oso avancer que chéto d' Merlimont qu in parlo ?

Ouais qu' am' dijo, Verton ché pas loin d' Berck.....

alors cha m' permetto d' em vire non pas dins l' cuisine , à la nuit tombée , bin à l abri face aux intempéries, mais près d' la mer, près d' Merlimont, près des dunes, bref, près d' min grand terrain d' aventures .............

j' raviso bin l' boite, mais j' me souviens que j avo posé eune question qu ale avo bin fait rire m' mère ...

ale voyo à min air qui a quéquosse qui m' géno such' dessin qui y avo sul' boite d' camembert de Verton...

quo qui a minloute ?

Bin coute m'man , ( in voyo au premier plan, des canards dins eune tchiote rivière , du qu' dins eune vaque ale éto in train d' boire, et que l' riviere ale allo vers la mer), l' io d' la mer ale do pas et' prope pour s' baigner

m' mère ale me d'mindo pourquoi, bin si ché vaques ale font caca d' dins l io, cha finit à la mer ..........

cha l avo bin fait rire, ale m avo bin expliqué que chéto eune imache comme eune autre, et que jamais l' vaque ale allo tchier dins l' io qu in pouvo artrouver si ins ' baigno l été dins ché baches .....

j a artrouvé taleure eune représentation du couverque d' la boite d' camembert Verton sur internet, j' su pas un pro, mais j' a l ' impression que les photos arprésentant ch' couverque du camembert in peut pas les copier et que ché protégé

par conte j a pas bin compris pourquo chéto marqué sul' couverque " fabriqué en picardie" , pasque si je n' abuse, le pas de calais, ché pas cor la picardie ?