va rimplir ch' broc

quequ' jours avant l' toussaint , j avo été avec min père au cimetière du 3 pour nettoyer la tompe d' ses parints

savez chéto cor eune tompe in cimint comme in in vo cor , tompe in cimint qui necessito chaque année un entretien d' fond en comble vu que l' mousse et l humidité ale s incrusto dins l' béton ..........

j y avo été avec min père, j éto cor jone savez, et bin sur chéto un temps d' toussaint, savez , quand qu' à 50 m ché gins qu' vous voyez ch' est plutot sous forme d' silhouettes qu in les aperçoit ...................

chéto un bon sentimint d' ma part d' vouloir accompagner min père, mais mi j' a vite comminché à m innuyer à ses cotés , al' raviser brosser l' pierre ...

j' avo bin comminché à li donner un coup d' main, mais chéto fastidieux et j a vite abandonné, savez j' éto dins ché zaches du qu in est vite découragé .................

alors, min père , pour m occuper y a eu l' "bonne idée " d' em dire, d aller au coin rimplir un broc d io comme cha min père i pourro continuer à laver l' tompe

chéto pas loin, ché d ailleurs ch' poste d' robinet qu in vo dins l' sujet "l' principe des vases communiquants"

mi j y va gaillard , et là , pas d' broc, chéto normal vu qu i avo pas mal d' monte qui avotent eu la meme bonne idée qu' nous , d' nettoyer ché tompes quequ' jurs avant la toussaint

"ché pas graffe" qui m'dit min père, t' artourne là bo , té longe ch' mur (ch' fameux mur d abattu) et té va pas loin jusqu' al' tchiote porte par du qu in est rintré , du qui a ché ouatères sul' coté ....

i devo avoir vu que j avo "tiqué" pasqu i rajoute "t as pas peur hein " pi "ya qu' ché méquants qui ont peur" et pi "té un grand asteure"

mi j y arpars un tchiot peu moins gaillard, y avo qu à suive ch' mur ........ pi j éto grand asteure ....

bin ouais mais savez , quand qu in est tchiot , j' avo moins d' 10 ans, dins ch' brouillard , j éto pas rassuré

t intindo ché gins tousser dans eune allée au loin, ou bien l'pas d' autes personnes crisser sul' schiste concassé qui yavo entre les allées , tout cha pas loin d' mi

chéto lugubre et oubliez pas qu in éto en plein brouillard et bin plus qu asteure

faut dire à l époque qui yavo beaucoup plus d' sépultures qui avottent des représentations comme des estatues,des bustes , imaginez d' vire l' buste d' Camille Houyez ou d' Jules Marmottan , sortir comme cha du brouillard.............. bin cha impressionne

et que dire des anches aux ailes déployées, ou alors l' pire comme j l' appelo à l époque ché tchiotes masons, ché "guerites" freumées par eune grille in fer ..............

au d'sus d' l' intrée chéto marqué "caveau famile untel" , j imagino ché morts à l intérieur comme si i zétotent dans eune vraie mason , et que si i voulotent , i pouvotent sortir , quite à enlever un tchiot jone comme mi qui passo inochemmint à la recherche d un broc

j' avo l' main gauche qui suivo ch' grand muret , quite à m écorner ché dogts

pi , aussi soulagé que la vigie d' la caravelle de Christophe Colompe quand qu ale a vu emerger les cotes antillaisses et qui a crié "terre" , j a vu dins seul coup d' vant mi à la fois l' tchiote porte , l' robinet et in plus in broc in plastique bleu ..................

j a poussé un grand soulag'mint ................ j étot tel'mint contint que j a ouvert ch' robinet en grand et que que j a eu les souliers et ch' bas del marrone tout fraique ...

mais cha faiso rin, meme pas mal, cha y est ch' broc y est plein, y a pu qu à r'tourner , suive ch' mur et pi tourner à gauche eune fo arriver au coin

j' a surtout ravisé du coté dech' mur, pas du coté des caveaux du qui aurotent pu sortir un revenant, ou du coté des estatues qui aurotent pu m hypnotiser , m' attirer à elles , sans savoir à quelle sauce j' sero mingé

j' sais pas si cha vous l' fait aussi, mais malgré ch' brouillard, malgré les caveaux , les estatues, les anges aux ailes déployées dins la brume, l' voyache du retour i m a semblé plus court

faut dire que j' marcho vite, quite à encore in rinverser sur mes souyiers ....quite à salir l' coin d' min mantiau rin qu en rasant ch' muret qui éto sur ma droite

d' un seul coup ch' mur i s a arrété, j a tourné à gauche et tout d' suite j a vu l' silhouette d' min père in train d' brosser l' plaque del' tompe

am' mote que j a pas su controler m' respiration ou que cha s' voyo que j éto essoufflé, min père i m' armercie pour l' io
et im' dit "cha a été ?" mi j' veux réponde d un air dégagé "bin ouais" mais j' avo pas vu que j avo pas arpris m' respiration, ché d' eune vo toute fluette que j y a répondu , eune vo d' garnoule , d' glaine peureusse

y a pas été dupe , pasque à la fin im 'dit " j'sais pas si j' va cor avoir besoin d un broc" , j a du am' mote lancer mes ziux au ciel, vous m' direz ch est l' endroit pour ......

pi im' dit , "nan cha va d' aller" pi pour montrer qui éto pas dupe "in va arpasser par la bo, comme cha té va pouvoir arposer ch'broc"

bin chéto bizarre , quand que j'su arparssé avec min père par l' meme chemin, j a eu l impression que ché estatues am' ravisotent cor, mais d un eule plus conciliant, que ché zanches i zétotent tous gentils, et qu' ché caveaux, chéto in fait des masons abandonnées

que voulez vous , ach' t age là , in s imagine vite fait des histoires .............