rue de l'esplanade mai 1940
par minloute le, 06/07/2011ché en ravisant l' nom des rues d'Bruay su Google maps qu' in lisant "rue de l'esplanade" que j a arpinsé à c' qui m avo dit min père
le 10 mai 1940, les troupes allemandes attaquent le Luxembourg , le Danemark et la Belgique , quelques bombes tombent à Bruay
10 jours plus tard, le 20 mai, ils sont à Abbeville ..........
depuis le 14 mai , et m' mère ale s in souveno, chéto un flot incessant d' réfugiés qui passottent en direction du sute
in freumo bin ché portes à clef, pour eviter tout acte d' pillache
min père im' dijo que la veille de l'entrée des allemands dans Bruay, i zavotent vu pas mal d' feumées du coté d' Divion, pi dans l' ciel des passaches d' escadrilles d' avions ennemis qui faijotent que passer et arpasser ..........
en fait et il l a su aprés, ché allemands i zavotent freinés voir bloqué l' flux des réfugiés au nord d' Saint Pol sur Ternoise
le 23 mai 1940, min père qui avo 29 ans ach' momint là, i éto parti au 3 apporter eune commission à quéqu un qui connaisso et qui habito rue de Bordeaux
ché au retour, in passant rue de l'esplanate, qui a vu au loin du coté d' Divion, un convoi militaire armonter vers Bruay
au premier coup d'eule , pour li chéto des troupes anglaisses qui venotent ichi pour établir un point d appui
i éto pas plus heureux qu' cha vu que dans l' ciel i éto occupé que par l aviation allemante , i s a dit que cha allo faire vilain et que l' ville ale sero bombardée à tous les coups
y a déchindu Boulevard Basly, passé par l école d' musique, pi armonté ch' pont d' la lawe , que là y a vu ché premieres zautos allemantes , pi des sides cars dont l' passager i avo eune mitrailleusse d' vant li
i pouvo pu arculer, donc in bas d' la rue d' la république, y a tourné à gauche et là y a pris l escayer qui yavo in bas d' la rue d' la poste, (l' rue Emile Chrétien après la guerre)
ché eune rue en pente, et vous ravis'rez l' photo que j a fait l' dernier coup, in vo bin un bout d' l' hotel de ville, mais pas l' plache qui a autour
min père i habito cor avec s' mère, chéto l' premiere mason à gauche tout in haut del rue quand qu on déchint, asteure ale a été abattu d'puis un momint
ché in montant l' rue, qui a vu qui yavo "du monte" su la plache, juste à coté d'la mason
en fait ché là que s' sont installés pendant 2 ou 3 jours des troupes allemantes
yavo eune cantine d installée, l' ambiance ale éto détendue
min père y in éto dégoutté, chéto des jones gins, blonds , athlétiques , bin habillés, beaucoup étotent torse nu, i parlotent fort ..........
pi dès l' lend'main , c' qui avo été vraimint démoralisant, ché que dès le lendemain, i y a vu arpasser mais dans l aute sens, soldats anglais et surtout les soldats français portant capote et bandes molletieres, sans armes, entourés de quelques soldats allemands
( 1 photos)