Sirop Thyphon Kario Gelée Royale et graines d' sésame

vlà pour ch' sirop Thyphon, mais que lien avec l' Kario , la gélée royale et ché graines d' sésame ?.......

Ché qu' un coup j éto arrivé d' puis un tchiot momint al' permanence syndicale place Marmottan, que j a fait armarquer l 'heure qui éto, et que mi j' commincho à avoir faim, que voulez vous à 16 ans , j' chausso du 45 et j' metto du 48 pour ché marronnes .....................

alors là min père i ravisse s' montre, et i dit qu in artourne al' mason , mais bin sur i n na un qui a d'mindé à min père si i pouvo pas l' déposer as' mason in passant

bin sur qui dit min père, in arriffe as' mason, connaissez la suite , "té va bin rintrer chinq mineutes Léonce" , "té verra l' grante commint qu ale a poussé", "cha f'ra plaiji am' femme" ...

y a dit ouais, in rinte, bin mes gins pour in arsortir, cha a pas été facile "boirez un coup Léonce" " ché pas souvint qu' je vous vois" " ché vot' dernier , mais y est aussi grand qu' vous" et patati et patata ...
min père i décite d' printe un tchiot verre d' vin cuit, tandis qu'sin camarate i va querre l' boutele d' Kario ...

"ah mi j' bo pu qu' cha " qui dijo à min père

en fait i avo été comme min père en sanatorium du coté d' Hauteville dans l' Ain, et ché au gré d' eune sortie qui avo gouté au Kario

l' Kario, in in voyo cor régulier'mint l' publicité dans ché journeaux, chéto eune boutele carrée, sombre, in auro cru avec du r'cul à eune boutele d' bourbon

chéto fait qu' avec des plantes cueuillies dans la montane, et chéto fabriqué à Belley

min père , par politesse i comminche à raviser l' boutele, sin camarate i li arprint des mains et i li fait acoutez, l' travail d un représentant
i n arreto pas d'trouver des nouviaux zarguments, chéto bon pour picher, chéto bon pour l' transit, mais ch' méd'cin i li avo dit que chéto bon pour chi , pour cha aussi, à l' acouter , t auro pu nin met' dins tin moteur d' carette et là chal' transformo in moteur d' formule 1

cor heureux que j éto là, et savez à 16 ans in n est pas très diplomate, j a dis à min père "ravisse l heure maman ale attend "

là chéto l' phrasse couperet et in a réussi à partir , j' diro pas dans la mineute ,mais au moins en chinq mineutes in arparto , i éto cor temps pasque min vinte i commincho à gargouiller .........