in arsortant du cimétiere
par minloute le, 11/07/2011in arsortant du cimétiere du 3, j a pris l' rue Paul Daguercar , vers la gauche, pour aller , toudis à pied, arprinte plus loin à ch' carrefour, la rue Victor Hugo à gauche ...........
faijo bio et j a apprécié d' vire un aussi bio ciel qui metto vraimint in valeur ch' terril du 3
pourtant quand que j' viens ichi , j a toudis l' souv'nir d' y avoir été que j' devo avoir 6 ou au pire 8 ans et que j accompagno mes parints ichi
ciel morne et gris d' Toussaint, avec ché nuaches sombes qui passotent à toute blinte en v'nant d' la mer
in éto dinch' cimétiere, pour nettoyer ché tompes, m' mère ale porto des bigoudis sous sin foulard, j' me souvins cor ....
j avo l impression,qu ichi in haut del cote , in éto pas si loin d' ché nuaches qui nous survolotent avec leu masses imposantes ......
ché in sortant du cimétiere par l' tchiote porte, qu in a eu dro au vint , protégés cor qu in éto à l'abri d' ech mur d' enceinte
in face d' nous yavo ch' terril , il avo djà un air lugubre, y éto djà freumé définitiv'mint
yavo cor pas loin des ' base des batimints mais j a l' souvenir qui avo djà d' nombreux d' carreaux d' cassés
chéto avant que tout y so rasé courant 1969.....
ché t imache là que j a toudis dins m' tiete quand que j' su là bo
déjà ché grosses gouttes ale tapotent ch' sol violemmint
i a accéléré l' pas, traversé vite fait l'route, et in a tout juste eu l' temps d' rintrer à l interieur del carette que l' déluche i s' déchaino
cha buquo sec sul' tole del 403 break d' min père........
faut dire que l ' insonorisation d' l 'habitaque del carette chéto loin d' et' à l 'orde du jour des ingénieux des usines Peugeot d' Montbéliard
in a attindu in bon momint, in voyo rin à l' extérieur, in plus ya tout d' suite eu beaucoup d' buée qui s'éto déposée à l intérieur su ché vites
mi assis à l arriere, j' m amuso à dessiner des personnaches avec min dogt sul' glache pour patienter
quand que cha a bin voulu s' calmer, min père y introuvert s' vitre, li y avo dro ................
pas mi à l' arriere, si j avo pas eu sin orde solennel .....
aprés i metto le starter , i démarro l' carette, pi i metto ch' chauffache in route
fallo et' patient , alors i frotto ché vitres à l' avant avec un chiffon ...
et là mes gins , i m' passo ch' chiffon aprés pour que j' fasse à l arriere ché vitres su ché coté
mais comme i yavo un sacré paquet d' buée, là j avo l' orde , et j in éto tout fier, d' passer par dessus l' sieche arriere, d' passer dinch' coffre , j' vous a dit que chéto eune break , et là j' frotto l' vitre arriere avec ch' chiffon
eune fo à nouveau à m' plache, là , vitres baissées, l'temps d avoir eune bonne vision, i démarro s' marche arriere , pour s armette dans l' sens d' la marche et qu in ardéchinte vers l' viux Bruay pi aprés armonter rue Anatole France
in éto passé par la rue Bonnet , et là in bas in avo été farcé
vous dire si in avo pu passer ou faire demi tour,j' pourro pu vous dire
in tout cas in avo eu du mau pasque chéto innondé rue d' Amont
la photo que j a mis ché celle qui correspond l' miu al' vision que j a l' plus souvint quand que j'busie such' terril du 3
du temps que j éto tchiot ...........
dins l'temps, quand les carettes sont deve'nues d'pus in pus nombreuses pour celles et ceux qui v'notent d' Béthune ou d'ailleurs i avo un agent d' police qui faiso l' circulation au cimetière.
nous autes in i allo à pied et in in profito pour aller rue d' Bellevue dire bonjour ale famile et min mononque Paul et matante Solanche Facon. qui habitotent rue du Duc Domale.
j'ai connu des hommes in rintrant après avoir dîné i z'allotent faire la sieste.
un verre par chi,un verre par la....i in avo qui avotent vint dins les voiles.
un jour in fait fort avec m' cousine in a rien d' treuvé miux que d' claquer des pétards j'en vous dit pas l' roustre qu'in a pris.
quand ej l'ai au phone in arparle toudis et in rit comme des bochus.
( 1 photos)