au matin à la mer 1
par minloute le, 25/07/2011personne dins ché rues ou pas grand monte, par conte fallo pas trop trainer au bord d' ché trottoirs pasque comme l' route d' Merlimont Plache ale avo été faite, arfaite, raarfaite, raccommodée, raracommodée, que cha faijo des bosses et des creux tout partoute
et bin sur ché carettes as' génotent pas pour t invoyer dins l' guiffe des gerpes d io en passant .....
j' passe d'vant ch' garage Esso su la droite, y a toudis des carettes su ché ponts lévés, du bruit à l intérieur, d' la leumiere qui sort d' la fosse au miyeu , d' tout temps cha sint l' huile et l essence
j' su étonné d' vire qui laisse la jeep dehors par tous les temps
ch' te jeep là, ale devo dater d' la seconte guerre mondiale, ale servo quand qui avo un véhicule d ensablé su la plache, ou si fallo amener des flobards à l io, chéto plus "classe" que l' tracteur
su l aute trottoir, à croire que tout l'monte a eu la meme idée , ché la queue d'vant l' boulangerie Carré qui fait ch' coin d' la plache
cha fait la queue pour rintrer , sous ché gouttes ... mi j' continue mon ch' min et j' va jusqu à mon Armand querre ch' journal
j' deminte la voix du nord béthune bruay ,ale est réservée au nom dem' grand mère , qu ale est aussi à Merlimont, mais ché mon mononque et ma matante, in fait such' meme terrain qu' nous, mais eux leu mason ale est du coté d' la rue Alphonse Leroy
croyez pas que j arviens tout d' suite ... j' fonce jusqu à la plage, pourtant mes parints i m ont dit d' rintrer tout d' suite, mais nan j' va aller jusqu à ch' drapeau des maites nageux
ou au moins m en approcher, in vo que ch' drapeau y est rouche, interdiction des' baigner, d ailleurs faudro avoir ch' mape pour s' baigner dans d' telles conditions, cha fait des vagues impressionnantes, blanques, avec des cretes d écume qu on artrouffe aprés tout le long du rivache, et la mer ale est pu verte , elle est grisse, mélanche d' sape et vase , armuée , ballotée comme dins l' tambour d eune machine à laver
su la plache pas grand monte, des couples qui vont et qui viennent , serrés l un conte l aute, quequ' fo avec un tchien qui li , défiant les intempéries, va courir le long du rivage aprés un bout d' bo lancé par sin maite
fait pas bon rester ichi en plein front d' mer, d ailleurs on intind l' fichelle en nylon du drapiau qui claque conte ch' mat, tel'mint qui a du vint
vite vite, in va artourner vers l intérieur , du qui a moins d' vent
comme j a pris du temps, j' arpasse pas par l' mason, j' va directemint vire m' grand mère pour li apporter ch'jurnal
ch' midi quand que viendra l' heure d' l apéritif, in ira ché mon mononque et ma matante , et là min père demindera à emprunter ch'jurnal am' grand mère, qu ale li passera , qu' min père i le lira aprés minger, et que mi , fidèle coursier, sera carqué del' ram'ner am' grand mère pour qu ale finisse del lire durant l aprés midi ....