la place L'Herminier
par minloute le, 04/08/2011 ché à Bruay, in face du que cha a été la maison de l' Administration, pi aprés ,intre aute, le Park Hotel
yavo eune tchiot monumint , in hommache au Commandant L'Herminier
un monumint sobre, avec eune devise sobre " la mer impose sa volonté à ceux qui l' affrontent "
quand que j' passo là et que j devo cor avoir eune douzaine d années au plus, j do dire que j éto pas indifférent à ch' te plaque ...
pour deux raisons, d' abord chéto l' époque du que quequ' fos , mes parints i m' laissotent raviser les Dossiers de l' Ecran, pasque l' lend'main chéto pas école
cor que vous m' direz cha dépindo des programmes, mais j' me souviens avoir vu un film qui raconto la chasse d' la flotte anglaisse pour couler l' Tirpitz , et un aut ' coup chéto la tragédie du Bismark
savez ché flimes in noir et blanc, filmés en cinémascope, qu in fait t avo dro à deux grandes bandes noires in haut et in bas d' tin écran, et ché personnaches vu que l' imache ale éto plutot "tassée" , ché personnaches i paraissotent quequ' fos tronqués
j avo eu dro aussi d' raviser un coup un flime sur el alamein , et un aut' sur des hommes garnoules italiens qui coulotent des batiaux alliés, grimpés sur des espéces d' torpiles
si si cha s appelo un SLC ou un maiale chéto sin surnom cha veut dire "cochon"
savez les dossiers de l écran, avec eune musique qu ale vous faijote frod dins l' do quand que commincho ch' générique, que chéto un dossier qu in ouvro avec les noms des participants
chéto animé par joseph pasteur ou alain jerome
d' abord i faijotent un bref résumé d' l histoire, i présentotent ché zinvités qu in verro ensuite au momint du débat qui suivo l' film
yavo souvint les vrais héros des faits de guerre , djà pu si jone, avec eune oreillette pour l' traduction, qui fallo attinte un bon momint pour qui comprenne c' qu in li dijo, que cha li so traduit et que aprés i réponte ...
et donc avant le débat du que les gins i pouvotent appeler durant ch' film pour poser des questions , yavo donc ch' fameux film
donc on arvient au commandant lherminier , que mi j' avo justemint lu quequ' temps avant son histoire dans un liffed' la bibliothèque verte qui s appelo Casabianca , du nom d' son sous marin
j' me souviens qui raconto et j' vo cor l' dessin qui éto associé à ché pages là, d un port d' Toulon sous les bombardemints des avions allemands, d' la flotte qui s' sabordo, et l' cababiana qui arrivo tant bien qu' mal à s'sortir d' la rade pour arjointe les forces alliées
et vlà ti pas que peu aprés, ché l' flime Casabianca , tourné en 1951 par Georges Peclet qui passe aux dossiers d' l écran, bin sur j éto djà au parfum mais j a eu ker suive c' qui éto pour mi des zaventures avant d' et' d' vrais faits de guerre ...............
alors imaginez, l' commandant Lherminier, vu qu en plus i avo s' plache à bruay, chéto comme un lointain cousin ..........