Henri boucher

nan ché pas l' nom d un ancien camarate ...... chéto quand que j' su artourné à Bruay au mois d' juin ...........

quand qu on armonte comme cha dins l' pat'lin du qu in habito et qu in a quitté y a grinmint d' temps, in a du maux à " s artrouver" , as' positionner ......

in l a djà évoqué, que che so mi, ou Nounours, in a à la fo l' plaiji d armonter pi d un aut' coté, in a du maux à artrouver nos repères

la vie ale nous a pas attindu, comme chi in armontant in allo dins zin "parc d attraction" pour artrouver l' ambiance et ché gins qui y habitotent ...

mais ch'est l' plus dur à admette, la vie ale a continué, et j' do dire qu'à Bruay , in vo rapid'mint les cang'mints qui y a pu y avoir depuis qu in est parti d ichi .........

quartiers "réhabilités", au miu....sinon corons abattus, rimplachés par des grantes étindues engazonnées .........

sans compter l' grouill'mint qui yavo , du temps que les mines étotent cor en pleine activité ......
commerces locaux dins chaque quartier

sans parler bin sur d' tous ché gins qui asteure sont pu là, et qu avec un tchiot pincemint au coeur, in passe d'vant l' porte d' leux masons ....

in s' arrete such' trottoir in face quequ' zinstants, in jette un coup d' eule, in reste pas trop longtimps sinan ché gins qui y habitent asteure i vont s' dire quo qu' ch est que chtilale qui ravisse m' mason .....

cha serviro à rin d' leu dire qu ichi j a habité, ou que chéto l' mason d' quéqu un del famille ...ainsi va la vie ...

après d ' un aut' coté, in fait aussi d' belles rincontes, et j éto bin bénache d' boire un verre d' coca sans chuque, rue ,boulevard ou impasse Basly..... sans compter min péripe du coté d' Marles ...........

y a des coups aussi, y a des souv'nirs qui vous arqueute d' sus à des momints, à des endrots que zauriez pas d' viner..

ch' est d' ailleurs là qui sont les plus intenses ........

donc durant min séjour à Bruay, j' éto du coté d' l avenue d' la libération à Labuissiere, savez ché l' grante rue qui part des quat' chemins d'Labuissiere, qui passe devant l' stade d' l'USOBL, pour aller vers l' poumon commercial d' la région, à savoir la Porte Nord ..

j' m éto arrété in route à mon chez Aldi, savez sul' gauche d' la route in allant vers mon Cora
j a ker i acaté eune sorte d' paquet d' biscuits pour s 'ardonner "du moral" vu que quand que j armonte à Bruay , j' armonte en train et qu après j' fais grinmint à pied, ché kilometes cha creusse, vu que j a cor un corps d' bambin ............

donc j' rinte dins ch' magasin ou plutot , in passe par un sas, du qui a eune boucherie traditionnelle, l' fameusse boucherie "Henri boucher"

j' do vous avouer que l' odeur del viante comme cha, dins les étals, zavouerez que chéto eune odeur qu in sinto tous les jurs quand qu in allo al' boucherie .....

quand qu in allo al' boucherie ....... j' va expliquer aux plus jones, qui a eu un temps, oh bin après ché dinosaures et la révolution française, in va dire environ 35 ans , qu in allo acater s' viante dans un magasin qui s appello eune boucherie .........

du que té d' mindo t' viante à quéqu un qui éto derriere un comptoir et qui découpo la viante que t avo choisi d' vant ti ...

y a meme des coups i rintro dans eune pieche derriere li, eune espèce d' chambe froite, in auro dit presque un coffre fort, vu qui avo deux grantes poignées métalliques sul' porte in bo pour in assurer l étanchéité ......

là , dins l' sas qui meno ach' magasin Aldi, j' m a arrété......

comme dins l'temps yavo des gins qui attindotent leu tour pour et' servi
comme dins l'temps ch' boucher i découpo l' viante d' vant elle
comme dins l' temps i peso l' viante aprés sul' balance

comme dins l' temps i arplio l' papier sul' viante et i le metto sul' coté

comme dins l' temps ch' boucher i d'mindo si l' dame ale voulo aut' cosse

comme dins l' temps in attindant sin tour, certaines ale zavotent ingagé l' conversation sul' météo ......

tout cha au final , cha n auro pas fait que j' me s'ro arrété d un coup ...

nan, ché tout simplemint l' odeur del viante , l' odeur del viante qui rimplicho l' pieche ..

ché sur que cha fait quand meme eune paire d années qu in acate del viante qu ale est posée su eune barquette in plastique, et arcouverte d' cellophane .......

y a eu qu à freumer ché zieux, minquo ptete su la droite l' odeur des saucissons à l ail qui pindotent l' long de crochets in fer , ni la voix de Marthe à la caisse et celle d' Omer qui vous d' mindo "dins l' échine ?" et cor moins l' bruit du couperet qui arquéyo violemmint sul' tape d' gauche, dins les mains du viel Edouard, et qui préparo ché cotes .......................

minquo qu' cha , chéto djà un retour in arriere, un retour à des sensations que j avo oublié, et ché par la soudain'té et la surprisse d' les arsintir, que j' l a vraimint apprécié

mi j'me souviens , quand j'allo al boucherie avec em' grand mère el facade a l'étot peint in rouche , et dins l'boucherie yavo d'el sciure par terre . ché normes sanitaires i z'étotte pas comme aujourd'hui, et in étot jamais malade . yavo pas temps d'imbalache qu'aujourd'hui!

i a deux ans quand ej su armonté à Bruay ej flâno dins l'rue d'Bône in prénant l' temps d' raviser toutes ché masons pour raviver queques souv'nirs et in vue d'mette des sujets such' site.

j'em su aperchu qui avo un type qui m' ravisot d'un drôle d'eule.
i a du pinser ch'tilale cha dot ete un voleur i v'nu in repérache.
alors j'ai traversé l' rue et ej su allé i expliqué s'qu'ej faiso la apparel photo in main. i a compris.

j'ai eu l' meme tour in allant boire un verre anciennemint ché Poquet Daniel et Mado.
l'histoire j'en vous l' racontrerai pas j'ai déjà évoqué l'sujet
ej qu'ej peut vous dire ché que j'ai archu un choc in rintrant dins ch' café