la grante épreuffe d' la dictée 3
par minloute le, 05/10/2011nous vlà asteure dins l' classe, chacun i s a assis as' plache, in faijant plus ou moins d' bruit, in babellant plus ou moins
(j a connu un maite à Loubet , mais chéto pas Mr Wacheux ni Mr Robitaillé, qui eux, respecto leu zéléfes, mais j in a connu un , que quand qu i yen avo un qui faijo trop d' bruit , i s amuso à li lancer en pleine guiffe un bout d' craie
d' vant eune bétisse parele, l' bon dieu , voir ch' diape, i modifio l' trajectoire del craie et chéto quequ' fo un qui n avo rin à s arprocher qui sel prenno dins l' guiffe, et meme un coup dins l eule )
mais arvénons à not' classe, ch' maite i obteno rapid'mint l' calme pi l' silence, pi l ' attention
comme tous les jurs i sort d eune pochette rigite, eune fiche différente, choisie par li , dont d ailleurs la "morale " ale est djà écrite au tableau, in d'sous d' la date du jur .....
zavez compris in comminche par eune leçon de morale, l' leçon d' morale , chas' passo ainsi :
ch' maite i nous lijo eune courte histoire , pi aprés in devo in faire l' résumé, et trouver ainsi l' messache que cha voulo faire passer
pour cha, ch' maite i poso des questions ,et chéto à nous à li réponde, mais cha s' faijo pas d' maniere empirique, in l' vo sin do et in attindo d' vire si ch' maite i nous choisisso
fallo surtout pas accompagner sin dogt l'vé, par "hé m'sieur, hé m' sieur" ,chéto l' meilleu moyen d' s artrouver avec eune punition du ginre " parle patois en classe" ou alors " éléve insubordonné, x lignes à arcopier" .......
aprés à la fin ch' maite i faijo un condensé des questions et des réponses et in in arvéno ach' dicton ou al' morale qui éto djà marquée au tableau
là ch' maite i nous d'mindo d' printe not' cahier du jur
d' là in devo arcopier c' qui éto au tableau, tout d abord l' date complète : jur, date, mos
pi aprés écrire à gauche " Morale" mette aprés 2 points , pi marquer l' devise qui éto marquée ach' tableau