la grante épreuffe d' la dictée 5
par minloute le, 10/10/2011cha y est nous in pousse comme un soulag'mint, comme si in veno d' faire un parcours sous l iau , in apnée, in comminchero à faire des commentaires , à s' raviser intre nous mais ch' maite i buque cor un coup avec s' règue sul' tape
cha veut dire , qui faut s arconcentrer pour certains, arreter d' j'ter des r'gards fuyants sul' copie du voisin pour d autes
d' ailleurs ch' maite i arprind certains qui malgré ses consignes, continuent desespéremint à essayer d' raviser l' copie du vigin, quite à attraper l' bleusse vue ...
nous zarvla dins l' vif du sujet, si chéto vraimint catastrophique aux vues des r'gards qui avo j'té par dessus nos zépaules, i pousso eune gueulante, quite à réexpliquer un dernier coup eune leçon passée , du que grinmint in avo achoppé ..................
ch' maite i nous zarlijo l' dictée, quequ' fos, comme Fernandel dans Topaze, i accentuo un mot pour qu in comprenne qui faut mette un s, ou qui faut mette 2 "n" ..................
chéto d' ailleurs eune derniere lecture qu ale éto souvint compliquée, pasque quequ' fos t avo des certitutes , pi del fachon dont ch' maite i dijo ch' mot ou qui insisto such' mot là juste au momint du qui passo derriere ti, te tet' d'mindo si fallo pas modifier un mot qui pour ti éto bin écrit ....
l' dictée ale est asteure finite d ete arlue, tout d' suite ch' maite i d'minte qu in mette ch' cahier au coin del tape, bin en évidence, et malheur à chti qui traino ou qui s' permetto d arprinte l' porte pleume que ch' maite i avo exigé qu in arpose dins l' rainure dech' pupite
là, l' temps qui ramasso ché copies, ou qui faijo faire cha par ch' fayot du premier rang, in s' raviso souvint inter nous, d un air un tchiot peu dubitatif, in éto loin d' et' sur d avoir pas fait trop d' fautes
tous ché cahiers i zétotent asteure impilés au coin d' sin bureau ach' maite
d' sin bureau posé sur eune estrate du qui domino toute l' classe
l' heure d' la récréation ale arrivo enfin, et in pouvo alors , chacun as' mote , s' libérer de chte contrainte que cha avo été d' rester concintré d'vant les lignes d' sin cahier
chacun as' mote i réagisso, certains courottent comme des ébeulés, comme pour s' libérer del pression certes, mais surtout pour passer à aute cosse
l' amus'mint del récré chéto plus important que d arparler d' la dictée, cha suffiso merci
d' autes s' rassemblotent pour justemint en discuter, et quequ' fos meme cha aug'minto not' doute, suffijo qui n avo plusieurs qui avotent mis par exempe 2 n à un mot et ti un seul et teut' voyo déjà avec eune faute dins t' carnasse .....
mais in éto vite arpris par l' défoul'mint que pouvo provoquer l' fait d' et' dins l' cour , vite in s arcourro aprés, suffijo qui n a un qui vous zavotent j'té eune tige dech' marronnier , (avec 2 n ?) pour qu in oublie sur l instant les soucis d' orthographe et d' grammaire qu in avo à subir durant l' heure passée
l' temps d' la correction i viendra bin assez vite ......