la grante épreuffe d' la dictée 6

souvint ch' maite i profito dins l' journée d un cours d' dessin, ou d un momint du qui nous faijo réviser en silence , ché récitations , pour arprinte la pile d' ché cahiers pour corriger l' dictée

alors là, nous in levo l' tiete, mais ch' maite i nous zardijo tout d' suite d' nous zarplonger dins nos dessins et qui voulo pu vire eune tiete s arléver

n' empeche que .... y a des momints ch' maite i pouvo pas s impecher d' souffler, d' raler, d' exprimer sin mecontint'mint d'vant telle ou telle dictée ....

i s importo quequ' fo in dijant " j' vous avo bin arprécisé la régle du c.o.d" ou " in n a pour qui ché l' çons cha rinte par eune orele et cha arsort par l aute"

(j' vous mets cha in patois, mais rassurez vous, i parlo que français)

y a des momints meme i cito un prénom "Daniel, té m ' l ' arcopiera ti , té fait toudis ché memes fautes , ché désolant"
tout l' monte i arplongeo s' tiete su sin dessin, sauf Daniel qui s'faijo djà pu d illusions sul' résultat d'es' dictée, cha sintira sur'mint pas bon , quitte meme à c' qui a des verpes ou des mots à arcopier et l' pire à faire signer par ché parints

ch' père i va cor sortir l' ceinture j in su sur .......

l' pire chéto quand que t arlevo t' tiete machinal'mint et que té croso l' regard dech' maite qui ach' momint là raviso dins t' direction

mon diu y éto in train d' corriger m' copie et as' n air cha a pas du et' fameux nan plus , bon du momint que j a la moyenne ....

cha y est ch' maite i a fini ché notations, pour cha i avo pris , privileche oblige, un aut' porte pleume et surtout un aut' encrier du que d'dins y avo d' l encre rouche ....

i classo aprés ché cahiers selon s' n humeur, soit i metto in haut du meilleux au moins bon et des coups du moins bon au meilleux

croyez pas qu in pouvo arperer not' cahier dins l'lot, chéto l époque du que in avo tous l' meme proteche cahier

rouche pour l' cahier d' devoirs, bleu pour ch' cahier d' tous les jurs, et vert pour ch' cahier d' brouillon

asteure l' journée ale arrivo à la fin, in intindo djà les éléffes del classe à coté qui déchindotent pour aller al' grille
nous in éto pressés d' les zarjointe , malheur à chti qui d' li meme montro qui éto djà dins les startines blocs, chti lale i éto sur d' rester dins l' classe l' temps que ch' maite i déchinte ché zéleffes jusqu au portal, et seul'mint aprés i allo arquerre ch'garchon impatient pour qui puisse, sans courir, arjointe s' mère qui l attindo , elle impatiemment , ale porte d' l école