salut Michel
par minloute le, 29/10/2011faut pas vire dans ch' tite là, l' moindre manque d' respect, au contraire
j' a djà dit in long , in larche et in travers tout l' bien, tout l' respect que j' vous porto
j a djà dit que zétiez sévère mais juste, passionné par vot' métier, et qu in avo interet à connaite nos l' çons et à bin t'nir nos cahiers , pasque zétiez intraitape ach' sujet là
ché vrai qu avec vous in a connu les écueils des fractions, du calcul mental, de pi ...
in a comminché à apprinte la géographie avec vous
j' a l' souvenir des compositions d' récitation du qu in passo chacun son tour ach' tableau et qu in éto noté
d ailleurs ch' coup là, mais cha pas étonner grant monte, zaviez dit qui fallo réviser les 6 dernieres récitations
bin sur mi j avo compris qui fallo réviser quel' derniere, alors quand que zavez fait v'nir ch' premier éléffe, et que vous avez sorti ch' dé , j' m a dit min sort y est j'té ...
mi j' connaisso pu par coeur quel' derniere , la sixieme, celle que cha parlo d' l automne, et que chéto écrit par Théophile Gautier ...
j a bin essayé d' tourner discrét'mint ché feules d' min cahier pour essayer d' m armette in tiete les anciennes récitations, impossipe à faire, zaviez toudis un eule su la classe
arriffe min tour, j y a été comme un bagnard, comme un forçat , qui attint pu qu in li mette au pied l' chaine avec sin boulet ...
faut dire aussi et chéto pas pour m' rassurer , que j'juo cor plus gros depuis qui n avo eu un qui éto passé avant mi et qui avo fait l' meme bétisse qu' mi et qui savo qu' el' derniere récitation
bin sur y a tiré au dé, eune aute récitation ,et quand que ch' maite y a vite intindu qui ahano , et que ch' moteur à paroles i éto in panne séque y a eu dro à eune mauvaise note
mais l' pire ché que ch' maite i s a artourné vers nous in dijant " i n na d autes qui ont révisé quel' derniere ?"
mi, j a pas osé l'ver min bras, et j' m attindo à d' sacrées représailles quand viendro min tour
cha y est ché à mi, j' em' leve, j' monte su l estrate, j' donne min cahier d' récitation, j' prinds ch' dé, et là , j' sais pas si Sainte Rita ale veillo sur mi, mais quand que ch' dé i s a arrété, i a qué sul' 6....
bin savez j' la récité avec soulag'mint , avec entrain, et j a eu eune bonne note
aut' souvenir d'Mr Robitaillé, chéto qui nous conduiso al' piscine, meme qu in l avo pu comme maite, ché li qui nous surveillo avec ch' maite nageur quand qu in appreno à nager avec l école
j in a plein d' souvenirs avec vous, un coup j a eu un bon point pasque j' savo c' que chéto eune écuyère
mais surtout pour mi l' meilleux momint, chéto l' vendredi aprés midi, chéto l' dernier jur d' la s'maine et cha s' termino toudis del meme façon
zalliez ouvrir l' armoire vitrée d' la bibliothèque qui éto au fond del classe
in allo chacun sin tour vous rinte l' live qu in avo emprunté l' semaine avant , pi eune fo que tout l' monte i l avo rendu, in allo s' rassire chacun as' tape
pi à nouveau chacun son tour, in allo al' bibliothèque choisir un nouviau live et là in allo arvire Mr Robitaillé à sin bureau
i noto l' tite du live qu in prenno, pi i nous poso des questions sul' live qu in avo lu l' semaine avant , mais chéto pas l' meme rapport qu in avo que durant l' reste d' la s'maine
chéto bin sur toudis un instituteux, mais in sinto ach' momint là , commint vous dire, plus de sentimints d' sa part
quand qui nous d'mindo c' qu in avo artenu du liffe , i nous poso donc des questions, mais chéto surtout pour vire si in avo bin compris
chéto aussi j allo dire presque un momint d intimité avec ch' maite, pasqu in éto seul avec li
d' ailleurs souvint durant l' temps que chéto "bibliothèque", i passo souvint aprés dins ché rangs, s asseyo au coin dech' pupite, pi d'mindo à chti qui éto assis à coté d' li , c' qui pinso du nouviau liffe qui véno d 'emprunter et qui devro lire pour l' semaine suivante
chéto un momint aussi espécial pasque ch' maite, pour pas empécher la lecture d' tout un chacun , i parlo à voix basse
bon fallo pas qui n a un qui ricane dins sin coin, là d un coup in l' réintindo , mais in avo l impression aussi que durant ché dernieres heures d' la semaine, i avo comme artiré s' blouse grisse, et qui éto très proche d' nouzautes
ché pour tout cha, que j' me permets quequ' temps après vot' décés, d' vous invoyer un messache bin amical, qui comminche par "salut Michel"
et tout simplement merci
einne fos d'plus ej dos donner raison am belle mére qui disot que l'Bon Dieu i fait ett figure à l'imache ed tin coeur... Ché einne belle personne .
( 1 photos)