l' première cigarette à minloute

parel, j' devo avoir 11 ans j' cro bin, et savez pas question d aller acater un paquet à mon dech' buraliste
d' abord pasque chéto à mon del boulangerie du qu in acato ch' pain, et j'éto sur que l' boulangère ale auro pas manqué d in parler am' mère, et qu in plus ale m in auro pas servi....

par conte , ché sur qui fallo qu on finque .....acoutez , si in voulo faire comme ché grands, ou tout simplemint pour faire comme dins ché films, du que l imache de " l'homme viril" ché qui avo toudis eune cigarette au coin des ' bouque, autant que quand que chéto eune femme qu ale finquo, cha arprésento toudis eune femme d' mauvaisse vie

d' ailleurs voyez ,j' me faijo l' reflexion hier au soir que j' raviso "flic story" , un film qui date d' 1975 du que alain delon alias borniche traquo jean louis trintignant alias emile buisson ...

i zétotent toudis in train d' finquer dinch' film là ....

mais arvénons à not' infance, commint s' procurer des cigarettes ? bin in les volo que voulez qu on fasse autremint ....

j' me souviens avec min camarate Joel, in s éto pris comme mission d'finquer eune cigarette chacun , in cachette , au fond du grand champ du qu in avo élu not' quartier général, sur eune tchiote butte, entourée d' ronces

un coup chéto mi qui avo mission d in voler deusse, jel faijo toudis dins l' paquet à min frère, pasque min père, li, ché sur qui finquo ach' momint là, mais chéto loin d'et' un carnassier au tabac ...

l' preuffe, i les rangeo dans eune boite in bo qui resto sul' tchiote tape d'vant la télé

mais comme i finquo pas souvint, in piquer eune cor ouais, mais 2 , chéto plus que risqué

tandis qu' min frère que chéto eune chaudière à finquer, y avo toudis un paquet in route

et ché là savez qu in a comminché fort, tout cha pasque min frère i finquo eune cigarette qui a complet'mint disparue asteure .....

ché l' gitane mais ..... djà savez , jel dit à ché plus jones, ceux qui avez l ' habitute d' finquer du tabac blond avec un filtre, y a cor 40 ans , l' cigarette à filtre jaune, chéto pour ché femmes ..........

ché zhommes quand qui fumotent pas des roulés, i zacatotent des gauloisses et souvint sans filtre, ou alors des gitanes ........

l' filtre meme pour des cigarettes brunes, chéto presque pour les chochottes ....asteure essayez d' finquer eune gauloisse sans filtre, ale va vous arracher les boyaux d'la tete ...

min frère li i finquo des gitanes mais, l' particularité del gitane mais, ché que l' cigarette toute intiere ale éto jaune , bin ouais l' couleur du mais
mais l' plus grante particularité, ché que la cendre d' la cigarette mais, ale éto pas parele que celle des zautes cigarettes, chéto comme si cha s éteigno tout d' suite, comme si cha s' rapprocho plus d un papier normal que d eune feule à cigarette

donc nouzautes quand qu in finquo cha, in faijo les fiers, mais pas longtimps
in faijo les fiers pasque in finquo des cigarettes d homme, pas des bouts d' sureau qu in avo djà "gouté" et qui bin sur nous avo artourné eune paire d' coups l' cerveau et qu in rintro pas forchémint dro al' mason, et comme pour Nounours, in avo un teint plutot livide, pret à dégobiller si in nous forcho à minger en rintrant ...

j' arviens am' gitane mais, donc comme ch' papier i éto espécial, as' consummo pas comme ché zautes cigarettes, donc souvint nous qu in avo pas l habitute, ale s éteigno ...

donc à chaque coup in la rallumo sous les railleries d'tin camarate qui dijo que té savo pas finquer , alors in ralleumo et in aspiro bin fort, c' qui faijo qu in tousso comme des poitrinaires , quite comme pour ch' sureau à pas s' sintir vraimint bin dans les mineutes qui suivotent

mais mi un coup j a fait plus fort , min frère i avo un viu paquet d' cigarettes dins sin tiroir ...j' do avouer que j in avo pris deusse

chéto un paquet bleu foncé , un paquet d' cigarettes plus épais qu' les zautes, chéto du tabac brun , pasque chéto marqué que chéto du "caporal" et d'sus chéto marqué "Boyard"
d' ailleurs ché bin plus tard que j a compris l' symbole qui éto arprésenté such' paquet, en fait chéto un russe avec sa chapka, un boyard ...

l' particularité des boyards mes gins, ché que chéto pas eune cigarette d' diamete normal, t avo l impression , éxagérée j in conviens, d' finquer un barreau d' cayelle


par conte voyez, et là j' m adresse à ché garchons, in a tous connus des momints difficiles souvint après eune cuite, et in s a promis alors d' pu boire chichi ou chelà vu que cha vous zavo artourné les boyaux du vinte et d' la tiete (mi j a pris eune cuite un coup au kirsch fantaisie, j' peux pu sintir ch' t odeur trinte ans plus tard ) ...

bin voyez quand qu in parle d' cigarettes "boyard", j' sins directemint querre sur mi comme eune barre d' plomb au niveau du front, comme ci j' porto d un coup un casque en béton, et j' m arvo cor , au bord du champ hésiter entre dégobiller ou tchier dins m' maronne ........

faut dire que chéto nin des tabacs pour nos jones poumons ......

eme premiere cigarette mi chéto eine feuille ed choux séché qu'in coupo comme du toubac et qu'un fumo

pi aprés min grand père y avo planté du toubac din ch'gardin y faiso sécher ché feuille din esse hangar j'y piquo eine feuille ed temps in temps

mais eme première cigarette el vrai cha été al féte des écoles al salle des fête j'avo 12 ans j'cro que j'ai fumé tout m'vie jusqu'a qui m'arrive un premier infarctus in 2005 ed pu plus eine cigarette et je m'dit que j'auro du arréter avant