Min peurmier ''clo d' cercueul''

D'abord, cha m' fait gramint plaiji d'arvénir écrire eun' bafoule ed'sur Histoires de Ch'tis. Tous chés matins, avant ech' journal et pis em' goutte ed' jus, ej' m'impresse ed' raviser ed'sus min site préféré pou mi vire qui cha n'est qui arot écrit eun' neuvielle histoire. Et dernièr'mint, i s' troufe qui id' na deusse qui nous ont racouté lu peurmière cigarette. J'a treuvé cha très intéressant et, à min tour, j' vas vos écrire ichi commint qu' cha s'est passé pou mi...

J'espère tout d'abord, que ch' tite, i n' vous ara mi flinqué el' droulle : ej' cachos jusse un synonyme à l' clope, à l'tige et je m' sus soudain rapp'lé ed' Gainsbourg (fin connaisseux de ch' sujet-là !) qui app'lot cha ses "clos d' cercueul". Ch'tot-là eun' rute imache ! Donc, em' peurmière cigarette...

Vos allez p'tête treuvé cha étranche mais tout cha sa s'a réell'mint passé comme cha. J'étos in train de m' préparer pou em' peurmière "mise in scène" à l'églisse (in réalité, ch'tot putôt el' deussième, pass'que el' peurmière ch'tot min baptême, mais là, em' mémoire alle est pas assez bonne !) : em' peurmière Communion mes gins.

Faut dire qu' mi, j'veyos cha comme eun' intronisation, eun' espèce ed' rite in somme. Cha ne m'faijot mi peur, mais j' n'étos pas ed' trop à l'aisse vec tout cha ! Bref, cha s'a passé normal'mint et pis surtout après i avot tous chés cadeaux qui fallot défiquer (ouvrir). Par conte, là, i fallot vire em' motivation...

Après cha, tertous ein est partis dins eun' salle des Fêtes pour ech' repas et pis profiter d'eun' imbiance à tout briser ! Ein a même armis cha durint deux jours. Mais ch' n'est pas l' sujet. A ein momint donné, ej' n' m' rappelle pus ed' trop quand, mais j' cros bien qu' ch'tot à quand ech' watiau (gâteau) i allot ête servi, ein m'a ed'mindé de v'nir à l' tape ed' chés "grands". Et d' là, quiquin i m'a tindu eun' clope et sin tape-feu (briquet) et i m'a dit ein truc du ginre :
"Allez, Jacky, à partir d'asteure, t'aras el' drot ed' finquer sins ed'minder el' permission !".
J'étos intre l'étonn'mint et eun' forme ed' gêne. Dins m' famile, tous chés z'hommes ou presque, i finquott'nt. Certains pusse equ' d'autes, mais à ch' l'époque-là personne i n' débuquot déhors pou... "daller in griller eun'". Cha s' passot dins chés pièches, ou pire des fos dins l' carette, vites (vitres) freumées. Heureus'mint qu' ch'timps-là i est révolu quind mânme !

J'arviens à mi et m' clope. Ej' m'arvos alleumer comme ein malapatte (distrait) cheule tiche (tige) blanque rimplie ed' toubac (ch'tot eun' blonte), aspirer cha comme ej' savos très bein aspirer dins eun' palle plongée dins min vierre ed' Tang (vieile boisson acidulée). Mais, là, pas l' mânme goût du tout ! Et pis surtout, eun' rute quinte ed' toux derrière cha. Naturell'mint, vos vos in doutez, cha a provoqué hilarité et mânme laissé ech' souv'nir-là ed'sur quéques photos ed' chés Polaroïd (viux apparèle, incêtre de ch' l'APN !).

In tout cas, ej' peux vos dire, qu' sur el' cop, cha m'a dégoûté et pis j' n'avos vraimint pas quère ech' l'arrière-goût qu' cha t' laichot dins t' bouque. Mânme après avoir mingé, ech' goût i étot toudis présint. Beurk... Eun' imache m'arvient in écrivant tout cha : je m' souvins aussi equ' sur chés tapes de ch' banquet in m' n'honneur, i avot ed' disposées, à côté d' chés coupelles à pos d' chuques (chés fameusses dragées bleusses, rosses, vertes ou blanques), ed' z'assiettes dins chelquelles ein pouvot es' servir à volonté ed' cigarettes, et d' cigarillos. Ech' jour-là, j'a rein pris du tout.

El' peurmière cigarette présintée, i ara fallut attinte insuite mes seisse ans pour qu'eun' aute occasion a m' fuche donnée. Un jour, qué j' rintros ed' l'école à pattes, quo cha n'est que j' treufe par terre ? Un paquet ed' clopes, tout plein, même pas intamé. Fier de m' trouvalle, j' l'avos mis aussitôt dins m' carnasse et pis précieus'mint muché dins m' campe. Quéques jours pus tard, j'a voulu vire si min goût pou ech' toubac i avot chi évolué. Et bah, et j'a invie ed' dire heureus'mint, pas du tout. Ech' paquet, j' l'a donné à min frère, qui li, s'étot laissé "happé" par ech' truc-là, et pis cha in fut terminé à tout jamais.

Enfin, i n' faut mi jamais dire "jamais", chinq ans pus tard à peu près, j'a réessayé aute cosse à finquer qui étot sinssé "détinte" : ed' "l'hierpe à faire rire". Mânme expérience, mânme résultat, vec, ein prime, ein rute mau d' tiête !

"L'amour, ch'est comme eun' cigarette..." qu'al'cantot Michèle Torr. Et bein, juss'mint, alle avot... Torr. Pass' que de l' cigarette, mânme si ein n'y a goûté, ein peut arriver à s'in passer, cho qu'i n'est pas tout-à-fait parèle vec l'amour... A bétôt mes gins !

Nous aussi in est bénache ed t'arlire sur tin blog Jacky
Vous pouvez aller y faire un tour y a d'nouviaux artiques, toudis aussi intéressants
El blog à Jacky ch'est facile à treuver vous cliquez ichi su l'site in haut del colonne ed gauche, écrit in jaune "Le blog de Jacky"

ech' réponds ach' premier v'nu din liste , d'abord ech'tite , qui dit bin s'qui veut dire
mi m'permière teuche j'avos pas cor 14 ans , al ducasse du 11 ed'lens , malheureusemint min frère qu'yavot 7 ans d'plus ecqu'mi , "j'vas l'dire a maman"
du coup avant d'rintré tout long d'el route j'ai macouillé min mouchoir "propre" mais mère al étot prévenue et la sintue quand même , bin j'ai pris in tatoul "j'avos l'habitude" j'etos un braf " mais cha n'impêche qu'cha fait du maux quand même

pi j'ai arpris tout duchemint a funquer quand j'ai comminché al fosse à 14 ans , et pi même au fond j'rimplachos l'teuche par in chique qu'j'allos volé din l'pock d'eh' l'ouvrier qu'ech' connaichos bin , chétot l'voisin d'mes parints
et un bieau jour l'occase sa présentée pour li , et y ma dit , té sais ya longtemps qu'min su rindu compte , té min dos in paire ed' paquet "chétot du gris"
j'ai pas eu l'temps d'el rimbourser yé décédé avant, j'ai appris cha j'étos in algérie , ché surtout avec li qu'j'ai appris NOTE métier

pour chés boyards minloute , la chétot pu des clos mais des gougeons d' kayelles , pour chés maïs , chétot ch'même papier , mais la fallot toudis saquer d'su , comme du gris ou du bleu

j'ai oublié ed' dire , qu'em dernière ya pas loin d' 20 ans qu'al est avalée , et pi y n'd'a in especiale qu'j'ai oublié d'signaler
j'avos cor min bistrot , chétot avant 1994 , ya un client "chetot un bon copain" ya pris min paquet d'bleu d'su ch'comptoir , mes feules , et un roulant j'ai bin vu qu'ya rajouté qu'ête cosse, qu'yavot fait cauffer avec sin bricquet bin j'peux vous assurer mes gins qu'j'ai pas t'nu l'coup longtemps , quand j'y in ai parlé 2 ou 3 jours apres y ma dit s'que chétot , j'sais pu ch'nom , mais j'sais qu'chetot d'l'hierpe , in est bin sur resté copain , client , mais j'ai pu jamais touché à cha