mes années 60 partie 2
par minloute le, 06/12/2011yavo aussi al' mason pour ché plus grands, y a eu l' révolution du tourne disque, d' la vague yéyé, et bin sur le rock and roll
j a vu m' voisine collectionner et coller sur les murs des ch' champe tout c' qui avo trait aux beatles
que vision du monte in avo en 1960 pour un éfant d' mon age ?
in l' voyo surtout à partir d' nos bandes dessinées, le héros éto souvint américain , in tout cas faijo toudis parti du "bloc de l'ouest" (rintintin et rusty,Docteur Kyldare, Batman, Flèche noire, Tex Jones, X 13, tintin )
tintin chéto pour mi l' meilleu exempe, dins ché histoires yavo souvint des espions d' pays communistes, ou des dictatures sud américaines ou arabes .... des gins qui venotent saboter ché fusées, ou qui voulotent abatte ou enlever ch' professeur tournesol ................
d' ailleurs in dijo djà qui yavo eu des tentatiffes pour nous copier les plans du Concorde
dins les pages "scientifiques" in couleur qu in trouvo souvint entre chaque bande dessinée, in nous projeto dans l avenir ......................
mi j a toudis l' souvenir d ' un reportache sur Mars, in y voyo des astronautes (donc forchémint d' zaméricains) d' ailleurs si t avo un doute , y avo bin in dessin du qu' té voyo en arriere plan l' fameux stars ands stripes "flotter" dans l' atmosphère martienne
in voyo ché astronautes donc, explorer eune profonte vallée désertique toute rouche, et dans l' ciel y avo des myriates d' fusées qui faijotent l aller et retour entre ichi et la terre
in nous prometto cha pour l' an 2000................
faut dire qu in plus à la télé in pouvo suive les exploits, les avancées des programmes d' la nasa à la télé , in les voyo tourner autour d' la lune , jusqu à c' qu in 1969, à la fin de chte décennie , ché zaméricains i zarriffent à mette l' pied
al' télé aussi, in voyo pas mal d' films d' espionnache avec des microfilms, des silencieux, des matraques ...
du que d' dins , ché gins du "bloc de l' est" , de derriere ch' rideau d' fer, i zavotent toudis l' mauvais role
toudis des tietes d assasin, qui torturotent ché agents secrets du bloc de l ouest
ouais, nous de ch'coté chi du rideau d' fer , in parlo qu in avo des "agents secrets", tandis que ché russes i zavotent des "espions"
faut aussi s'dire que ché russes i faijotent tout pour nous faire peur
in avo dro chaque année al vision d' leu défilé militaire su la place rouche
in nous parlo aussi souvint de berlin ouest et berlin est
pi autant ché zaméricains i zin faijotent "des caisses" autant ché russes, à part ch'fameux défilé, i zétotent plutot avares d imaches, j' me souviens qu in voyo que quequ' zimaches des aterrissaches des cosmonautes dans les grantes plaines de sibérie ......
in nous parlo aussi d' cuba, fidèle castro i éto arprésenté comme un "méchant" , faut dire qui éto bras d' sus bras d'sous avec ché communistes
au d'la tout cha , quand qu in voyo al' télé Brejnev, et Gromiko , in pouvo se d'minder si savotent rigoler
d'toute façon, ché zaméricains i comminchottent à met' l' paquet au vietnam, et i zallotent bientot gagner conte ché vietnamiens du nord, rin qu à vire ché B52 et l' ballet des zhélicoptères qu in allo commincher à voir régulier'mint al' télé
in allo connaite du que chéto Hué , Da Nang, Hanoi , Saigon
au point de vue "national" , in voyo surtout la silhouette du grand Charles qui par sa stature nous protégeo d' tout
i éto conte ché russes mais i avo pris ses distances des zaméricains, sacré personnache ........................
pi y a eu mai 68, cha a boul'versé plein d' imaches, meme mi à 8 ans , j' connaisso le slogan "crs ss" , in voyo al' télé ché véhicules qui brulotent et la charge des forces mobiles conte les manifestants ...
j' avo compris qui éto en train d' se passer quéquosse qui bouleverso les valeurs établies (min frère i criyo " à poil", in l auro jamais intindu avant cha)
j' me souviens après d' la photo du qu in voyo Charles de Gaulle avec s' femme en Irlante aprés s' démission
ché eune vision déformée que j' vous a fait ichi ; mais c'est c' que j avo artenu avec mes ziux d infants
in n' a pas toudis l' recul necessaire quand qu in est tchiot, on est plutot en train "d absorber" les connaissances, quite à s' faire sin avis personnel bin plus tard
ché un monte du qui a alors pour nous ché zéfants que des gentils d un coté et des méchants d' l' aute
vous avez d'viné d' quel coté in éto ............