la noel à mon Parrain Marraine

"parrain marraine" ,ch' est mon mononque et ma matante, j' a l' chance d' pouvoir dire "ch'est"

pasque in étant né respectiv'mint en 1923 et 1924 i sont cor là

quand que j éto tchiot i zhabitotent au 75 rue Anatole france , dins l' déchinte à gauche vers les 4 chemins

d' vant chez eux y avo djà pu d' masons, cha avo du et' rapid'mint abattu, j' pinse que chéto à causse d' la faille de ruitz qui passo par là, par l' rue d' chatel'rault, l' rue d' Isbergues et l' rue d' Montataire

pasque voyez dins ché rues là, j a toudis connu un indro du qu in avo du raser au moins un bloc d' masons

j' me souviens des masons du haut d' la rue d' montataire et celles d' la rue d' isbergues , quand qu ale zétotent cor debout , j y a vo rintré un coup discret'mint avec min camarate Josien, et j avo été surpris rue d' Montataire d'vire ch' carrelache arlévé d' chaque coté , vers l' centre del pieche, comme si chéto 2 vagues qui s arjoignottent

j a appris plus tard que cha avo un nom espécial, cha s appelo du "pianotage" dins l' jargon des carreleurs

donc pour in arvénir al' mason d' parrain marraine, leu mason ale donno vers bruay

nous in habito au 76 rue anatole france, (chéto l ancienne numérotation, pasque aprés chéto le 472 rue anatole france) , l' mason qui fait l' coin del rue leverrier

du coin d' ailleurs del rue leverrier in voyo in contre bas dins l' déchinte l' mason d' parrain marraine

j a plusieurs souvenirs d'leu mason, mais in périote d' noel, i n a un qui m' reste toudis et am' mote qui est pas récent

pour mi, j' pinse que chéto à la noel 1967 ou 1968

chéto un soir, et cha s' passo dins l'grante pieche qui yavo après l' cuisine

l' mason d' parrain marraine y avo in bas , la pieche de devant qui donno sur la rue, ch' couloir qui meno à l escayer pour monter à l étache, l' grande pieche, au coin del grante pieche, yavo l' porte pour déchinte à la caffe

après cha continuo par l' cuisine avec ch' fourneau bas qui prenno tout l angle , aprés yavo eune tchiote pieche ou plutot eune espèce d' couloir qui permetto d acceder al' buanderie

donc in éto dans l' grante pièche, chéto un soir, j' me souviens qui faijo noir dehors , in éto tous debout au miyeu del pieche

et j' me souviens cor des cadeaux que j a eu ch't année là, chéto 2 liffes d' bandes dessinées, 2 reccueils d' rintintin et rusty, que j a tel' mint lus et arlus que ché là comme j' dijo dans un artique précédent, ché en lisant ché bandes dessinées là, qu in avo eune approche du monte pro américaine , à vire dans les sujets intitulés "mes années 60"

in plus de ché liffes, j avo eu un grand garache et j in éto fier, vu que l année avant j in avo eu un plus tchiot par mes parints et que j' sais pas commint que cha a pu s' passer durant l année, est ce par inadvertance, soit un coup du sort , soit que ché matériaux i zétotent pas prévus pour supporter un tsunami , soit ......

soit m' mère ale auro dit "mais que brisaque chtichi, sin frère et ses soeurs ale zont gardé des juets durant d' zannées, li i casse tout " ..............

bref cha quéyo bin d' avoir un nouvieau garache, et là chéto pas un tchiot comme j avo eu avant

là j' va printe un peu d' temps , j' va d'minder aux garnoules d'em pardonner pasque j' va rintrer dins l'description du garache et cha cha peut interesser que ché garchons in maronnes courtes qu in a tous été ...

donc pour ché files j' va mette des ****** plus bas comme cha pourrez aller directemint à la suite du sujet

pour ché garchons, donc ch' garache que j avo cassé , chéto commint vous dire, comme si chéto eune estation service d' campane, avec ché vrai eune rampe sul' coté qui permetto aux carettes d' monter s' garer sul' toit du garache

ché portes d' l' atelier i s ouvrotent et in pouvo y intiquer ché carettes pour les y garer

chéto un garache pour ché interventions les plus courantes .....

tandis que chti que j a eu par parrain marraine, chéto un garache d ' concessionnaire

d' abord y éto à trois zétaches, yavo eune rampe qu ale monto en colimaçon , et in pouvo aussi ranger au dernier étache ché carettes mais in plus , yavo un ascenseur

yavo un ascenseur , eune espèce d' monte charge ,que d' dins té pouvo i mette eune carette, après té tourno l'tchiote manivelle et té pouvo ainsi déposer l' carette au premier ou au second étache

in plus yavo j' me souviens des gomettes publicitaires à coller sur ché enseignes y avo j' min souvient cor des marques qui arsemblotent à ché marques connues, du ginre "castol" pour "castrol" n "ilf " pour "elf" etc etc

cha faijo d ailleurs rire mon parrain quand qu in a comminché à tout déballer

in plus au rez d' chaussée y avo un ateyier que si t' ouvro l' porte té pouvo faire monter eune carette sur un pont qui s' levo aussi avec eune tchiote manivelle

la station service d' devant chéto eune grante pasque yavo 2 séries d' pompes

bin sur dés que j a comminché à juer , j a cassé un tchiot lampadaire qui éto fourni, j' m a fais ingueuler par m'mère, meme après avoir dit "j' la pas fait expret" , "bin cor heureux " qui avo répondu mon mononque in rigolant ......
****** CHA Y EST ché garnoules ale peuvent arvénir lire la suite ...

j' éto contint d' min cadeau mais savez commint qui sont ché zéfants, j' lorgno sul' cadeau qui avo eu min cousin qui avo tro ans d'plus qu' mi

li y avo eu mon reffe, un reffe pasque j' la jamais eu mi personel'mint, chéto savez ch' manèche à pigeons, yavo tro pigeons d' fixés su un axe, et yavo eune tchiote carabine à 2 coups qui éto fourni avec

là parel, té devo i intiquer deux fleches in bo qui s' terminotent par un caoutchouque d' ventouse

voyez ché trucs dans l' temps pour déboucher ché ouatères, bin chéto parel mais en mignature

là min cousin i ralo pasque chéto l' soir, qui auro voulu utiliser l' manèche mais comme i faijo noir, i pourro l' utiliser que l'lend'main dins l' cour

i avo meme fait un coup d' colère , i s éto fait disputer, mais m' grand mère qui vivo chez eux en permanence, ale avo pris d eune certaine façon la définse d' min cousin en s adressant à min mononque

"d'toute fachon André, ché d' vot'faute, in offe pas eune carabine à un éfant" ......

cor un coup rhabillé Parrain, mais bon i éto d' bonne constitution , pi savez pour "cohabiter" avec m' grand mère de 1945 à 1988 i fallo eune sacré dose d' abnégation et d' patience ...........

au bout d un momint Parrain pour dédramatiser ch' t histoire , entre sin fils qui brayo et s' belle mère qui ralo, i s éto artourné et s éto arprésenté d'vant nous avec l' fleche fixée su sin front

in douche i avo mouillé ch' caoutchouc et ché comme cha que cha collo sul' pio d' sin front

i prenno alors sin air "l' plus dégagé" d'vant m'grand mère, là chéto radical, m'grand mère ale soul'vo à la fo ses épaules et ale roulo ses ziux vers l' ciel in dijant rin mais qu in pouvo traduire par " mais pourquo Marthe (m' tante) ale vous a épousé ?"..................


mais arvénons à min garache, mi aussi j a comminché à braire pasque au bout d un momint , y a fallu l' rimballer pour artouner al' mason d' l' aute coté del rue nationale

ah ché zinfants i sont JAMAIS contints ........