Les jardinsun matin d'été 1954
par chtitalienne le, 12/12/2011L'porte al est grant-ouverte, i fait caud, y'a ché vosins devant em 'maison qui parlent in tr'eux, y'a meme la "belle envolée" qui rit aux éclats.
Ma tante Paula est dinl'cuisine in train ed touiller ech 'lapin dinch' fétout, ah ouais , ej vous ai pas dit qu'ech matin , y'a du montt plein el maison.
Em manman al est din l'piéche ed devant avec m'soeur , mi, in m'a dit ed m'assir sur ché marches d'escalier et pis ed pas bouger, alors ej jue à min jeu préféré, ej fais simblant qu'in est in auto , mi et pis min nounours et ed timps in timps , in dot s’arrêter pasque nounours i dot dégobiller à travers ché barreaux d'eul rampe d'escalier.. ej m'amuss bien!
El porte d'el piéche ed devant al vient ed s'ouvrir ... Pourquoi qu'al est habillée comme cha m'soeur?? quo qui ss'passe , j'ai peur mi , j'ai qu' 4 ans ... ej m'arlieff ed ché escaliers et j'comminche à braire, au lieu de m'consoler in m'ingueule , devinez qui?? On pleure pas aujourd'hui , ta soeur elle se marie!! que m'hurle ma tante Paula!!
Les vla qui s'in vont , min papa im 'donne einne bess et i m'dit d'ett bien sache, que bétot cha s'ra min tour (y'avot l' sins ed l'humour li) , j'arprinds min voyache avec nounours . j'i chuchotte ass n'orelle que, hier, j'ai vu d'el tarte dins l'piéche devant mais i faut qui seuche raisonnapp , ech voyache y'é core long et in peut pas s’arrêter comme cha toutes les chinques mineutes hein...!
