Conte du manèche ed Noé
par TIOT RITAL le, 20/12/2011Conte du Manèche ed Noé pa Tiot Rital
Présinté au deurnier Noé in Chti
Imaginez mes gins, l’velle ed Noé, à l’breune, eine tiote plache d’villache bordée d’apes illuminés, aveuc l’cloquer d’l’églisse décoré d’belles leumières et au mitan d’jolites baraques du Marqué d’Noé. Et à l’débout, un manéche pou infants …. Près du manèche avez-vous armarqué quéque cosse ? Nan ? Ebin, j’vas vous l’dire :
I’avot un aploute eine miette trisse qui ravisot les jonnes montés dins l’manège tourner au son d’eine terte musique. Ch’tot les deurniers tours. Pourquo l’jonne étot tout seu ? Mystère ! Mais à vir l’état d’ses sorlers ratass’lés, ses loques abongées, s’figure bribousée, seur, à s’mason in d’vot pon rigoler ! Bastien, l’overrier joqueux, qui passot, dit au gamin :
« Ebin, té n’d’as pon cor assez, m’gueux ? El manège freume, fot daller à t’mason fieux ! « .
L’tiot, l’argard au lon, pierdu dins ses pinsées, soumaque : « Ej sus jamais monté ! ». Bastien comprind alors l’chagrin d’l’enfant. I oblie s’prope misére, fougne s’poque et arsaque les sous pou s’pain. I n’d’avot assez pou faire un tour d’manèche à l’infant ! I les donne au tiot jonne ébahi, qui vot réaliser sin pu ker dési !
Tout seu dins l’manéche, l’bout d’culs délaisse les tanks à canons, les rouches carettes, l’bleu avion, l’bédon et sins barguégner, i sé hauche su l’quévau ! Et i rit gramint d’êt’ su s’dos ! S’joie fait telmint plaisi à vir qué l’patron du manèche l’a fait torner, torner, torner …
Et, magie d’Noé, sin rire faisot overre les ferniètes des masons viseines et sorire les gins hureux d’vir l’infant bénache ! Et l’carillon d’l’église s’est mis à juer d’joïeux cants d’Noé …arpris douch’mint pa les gins ……
Fin du conte
A ch'momint là, el conteu i s’arrête … eine feimme s’approche à côté d’li et eusses deux murmu’te el biau cant « Douce nuit » (Stille nacht). El conteu invite alors l'public à l’z’accompagner. Aveuc plaisi l’public i les suit et murmure el canchon aveuc des la la la ….
Biau momint d’partache !
Pour comprinte quèques mots (mis pa orte alphabétique):
abongées : mal ficelées
apes : arbres
aploute : enfant fragile
arsaque : retire
barguégner : hésiter
bédon : cochon de lait
bénache : heureux
bout d’culs : petit enfant
breune : crépuscule
bribousée : sales
cloquer : clocher
ferniète : fenêtre
fieux : fils + terme d’affection
fougne : fouille
freume : ferme
gramint : fort, beaucoup
gueux : gueux mais terme d’affection
(s’) hauche : se hausse
joqueux : chômeur
juer : jouer
loques : vêtements
muché : caché
overrier : ouvrier
quévau : cheval
ratass’lés : ressemelés
ravisez : regardez
ravisotte : regardaient
rouges carettes : autos rouges
seu : seul
seur : sur
soumaque : sanglote en parlant
sorlers : souliers
terte : douce
salut tiot rital , et bravo pour ed' n'histoire , din tous chés mots in'd'a trois ou quate qu'javos oubliés , comme soumaquer , pourtant chés des mots courants ed' moins in moins imployés