m' grand mère et ses avis
par minloute le, 21/12/2011ma grand mère, née en 1892, ale a traversé eune bonne partie du 20 ème sieque mais avec des idées et des principes d' la fin du 19 ème, in tout cas un esprit d avant la premiere guerre mondiale
ché pas pour rin qu in l appelo derriere sin do , "ch' commandant" comme j' dis asteure " ale avo un avis sur tout , et surtout un avis"
mais toudis un avis au départ défavorape
quand qui yavo quéquosse qui veno "bouleverser" ses habitutes , ale éto réticente pour canger d avis ou ale voyo l' mal partout, fallo toudis dédramatiser
queques zéxempes
là ale éto al' mason et mi j' buvo min chocolat frod avec eune paille
"mon diu, mais que sale habitute d' boire avec cha","i respire te pas quand qui bo , ché pas bon pour li" , "i pourrotent l avaler "
ale s adresso non pas à mi , mais am' mère pour qu ale intervienne et y a des coups cha faijo d' zétincelles
ouais cha chéto l' créneau dem' grand mère, dans chaque situation essayer d' trouver l' pire scénario catastrophe .....
j' vous a djà raconté que pour elle , l'huile pour faire ché frites chéto fait avec del queue d' bidet .....
que quand qu in rincontro quéqu un qu in connaisso pas fallo croiser ses dogts dins ses poques .....
que quand qui yavo risque d oraches ale verso du sel dinch' gardin et devant la maison..........
minge pas cha , té sais pas duqu' cha vient, va laver tes mains tel conno pas chtilale
mais am' raconter des zhistoires comme cha un coup ale m avo fait peur, j allo aux ouatères, et j in éto arvénu en dijant , j éto cor tchiot que j avo eu du mau à faire caca
malheureux quo que j avo pas dit là, ale m a arsorti eune histoire que cha m a constipé un momint, am' dijo qui avo eu quéqu un del famile qui avo forché et qu' sin anus i éto arsorti ............
nan nan , chéto eune méfiante m 'grand mère, j' vo et in in souri cor, mon mononque qui a toudis habité avec elle, ouais y a épousé mamatante en 1945 et y a habité avec m' grand mère jusqu à sin décés en 1988, i li a fallu eune bonne dose d' patience et d' philosophie pour viffe avec elle
mon mononque ale l avo ker m' grand mère, mais pour elle i éto toudis un peu "foufou" , attintion quand que j' dis cha, ché qui éto catholique , ah ouais fallo cha pour m' grand mère, mais au cours des ans , y s a rapproché de c' que ché devenu le parti socialiste
alors cha m' grand mère ale pouvo pas admette cha, elle qui éto catholique pratiquante d' l'ancienne génération, ale "tiquo" toudis un peu avec André
quand que mamatante ale a dit as' mère qu ale auro quer fréquenter André, m' mère a li a répondu peu aprés "qu ale s éto renseigné et qu' ché renseignemints i zétotent pas bons"
ma matante dans un premier temps ale a accusé l' coup, pi tout douch'mint m' grand mère ale a accepté qui s' vo, enfin j' voudro dire aussi que mamatante et monmonque i s'voyotent quand meme en cachette
et que m' mère as porto garant aux ziux des' mère des' soeur quand quale sortotent
par conte voyez min père li y a été accepté tout d'suite, bons renseignemints ,catholique pratiquant, qui faijo partie d' plusieurs mouv'mints , i s occupo des jones catholiques, i participo à des réunions organisées par ché pretes, i faijo ché pelerinaches .....
c' qui l a pas impéché au cours des zannées de d'venir pour mi quequ un du centre gauche
mais voyez i avo j allo dire l' bénédiction dem grand mère
quand que m' grand mère ale voulo parler d' ses sous, quand qu ale voulo so investir ou placer d' l' argent, ale faijo v'nir min père à mon dem' tante, et i s infermotent dans eune pieche à deux
cha faijo sourire min père, ma matante et mon mononque , pasque eune fo l' réunion passée, min père i s arringeo toudis pour tout raconter à ma matante et mon mononque
et y a jamais eu d histoires d' sous intre eux , i s estimotent tous grinmint
quand qu on d'mindo am' grand mère pourquo qu ale faijo cha, ale raviso Léonce min père et ale dijo " Léonce, ch est Léonce" , ale rajouto rin sur André mais cha voulo tout dire
par conte j' do dire que mon mononque meme si y a des momints y eu aussi d' zétincelles avec m' grand mère, y a mené aussi sa barque al' mason, et y a armis m' grand mère as' plache eune paire d' coups
pour terminer sum' grand mère, y a des coups quand que j' pinse à la vieillesse, j' l arvo dins sin fauteul les dernieres années des' vie, en dijant" mon dieu v'nez m arquerre"
mi j' comprenno pas commint qu in pouvo d'minder à partir alors qu in éto sur terre
pi j' arpinse souvint quand qu in li dijo , ah mémé té va bientot et' such' journal l' jur de tes 100 ans , té va et' in photo avec Serche (Serche chéto Serche Janquin ch'député maire d Bruay)
ah nan qu ale dijo, pas d' photos such' journal, ale in avo dit la raison à ma matante, ale voulo pas qui a des gins comme dans son temps, qui prennent ch' journal comme papier toilette et qui s essuient leu derriere avec s' photo .....