j' va ti la réussir ?
par minloute le, 25/12/2011comme aujourd hui ch est Noel , et qu in a eu nouzautes not' premiere gelée d' l année, j a pinsé ch' matin à ché zoziaux, j a été armette des graines dins ché masons in bo dehors
et arrivant j' m apercois qui n a eune que ch' plaque d'fond ale avo cédée
donc artour à l ateyier, ouais y a toudis eune permanence meme un jur d' congés, in fait cor miu qu' darty nouzautes ....
j' prinds l' perceusse, j' mets un tchiot foret, et j arperche des trous pour pouvoir arvisser l' plaque par in d' sous sur ch 'support
ché en vissant et comme j' devo busier à noel en meme temps j' su sur, j' m a souv'nu d eune des hantisses dem' mère les jurs qui précédotent la noel
et cor ale éto rassurée que quand qu ale l avo faite et réussie ....
chéto l' mayonnaisse maison, ouais pas eune d' ché "mayonnaisse" escusez me mais j a du mot à appeler cha del "mayonnaisse" savez ch' te mélanche qu in trouffe in tupe ou in bocal et qui est sinsé avoir l' meme savoir qu eune vraie mayonnaisse mason ..................
l' mayonnaisse mason , fallo l'faire pour l intrée, ouais ale faijo toudis eune entrée du qui avo soit du pichon froid, soit yavo du crape ou eune tchiote macédoine à préparer
l' tape ale éto misse , y minquo rin, tout y éto prèt, l' dinde ale cuijo normal'mint dins sin jus , tout douch'mint, in intindo l' jus frémir dins ch' plat , et à chaque fo yavo comme eune tchiote bouffée qui imbaumo l' pieche ....
nan .....tant que l' mayonnaisse ale éto pas faite et réussie cha allo pas
vous m' direz m' mere eune fo s' mayonnaisse tout juste faite, ale crio à min père " j l a réussi" min père i li dijo " t as vu tel' réussit toudis" ...
ché pas pour cha qu' as' détindo ....yavo aute cosse qui veno assombrir ses pinsées ......... est ce ché légueumes i s' ront bons, est ce que l' buche ale s'ra à la hauteur
en fait em'mère ale resto crispée jusqu à c'qu in so au momint du café ....
asteure vous m' direz, ale passe la noel sans zete inquiete , y a ché dames à la Mapatte qui leur font à minger
cha m'a fait arpinser am belle mére qu'al avot l'maladie d' Parkinson et min bieau frére i disot toudis "al pourrot faire el mayonnaisse pour tous ché quartiers d'Naples mémé"