pas m' journée préférée , partie 5 souvenir d un sapin de noel

vous raconter asteure c' qui allo m' arriver, acoutez j'do l' faire pasque voyez, mi j' su l'seul rescapé

savez m' situation ale va pas s améliorer durant les jurs qui vont suiffe la noel

j' va plutot et' toléré qu aute cosse , j' sers pu à rin ché vrai pasque la noel ale est passée

j' va meme intinte " i gène chti chi in devro l artirer" , cor heureux ché que des paroles en l'air

cha sint la fin d ailleurs....

ché soeurs ale sont arparties ch' matin, l' mère ale les a suivi du regard ,qu ale les raviso partir au coin d' la Rue Nationale

meme que j avo armarqué qu à chaque coup ale essuyo eune tchiote larme en rintrant ...

ch' père i dijo

" toute bonne chosse à une fin comme dit l' proverpe "

là j' vous avoue que ché beaucoup plus calme al' mason, d abord minloute i tourne et ratatourne pu autour d' mi , surtout que là ché arvenu du sérieux, jel vo machuquer sin stylo , y est en train de faire ché devoirs pour la rentrée

plus dur pour li, pasqu i s'faijo vite distraire, chéto d apprinte eune leçon ou eune récitation par coeur ........

cor 1 ou 2 jours, et j' savo que min sort i éto scéllé, d ailleurs j' vo l' mère ram'ner ché boites vites d' décorations d' noel

et là, avec minloute , ale artiro ché décorations eune à eune..

là ché pas agréape pour mi, j' sins qu in m' déshabile, l' meme impression voyez qui a du connaite l' capitaine dreyfuss quand qu in l a dégradé, bin ouais in li a artiré aussi toutes ses décorations .....

j intinds l 'mère qu ale dit cor, vinguette i a cor perdu d' zaiguiles ché derniers jurs

quo que ch' père y a pris m' défense, j a bombé l' torse àch' momint là , y a dit" bin acoute mi j' trouffe qui s a cor bin t'nu chtilale, y a pas tant perdu qu' cha"



j' vous zarmercie Monsieur d' m avoir donné un dernier complimint, là on artire l' toute derniere décoration , l étoile qu ale éto tout in haut

l' mère ale ringe ché boites d' décorations pi ale artire l' papier scintillant qui yavo tout autour d' min pot

"alors quo qu' tin fait Léonce ? " qu ale dit l' mère

acoute in va l' mette dins l'cour pour l instant


là voyez j' prinds eune grante respiration, vu que pour mi j' va quitter d un coup un univers douillet, car meme si j éto pas si près du radiateur, i m invoyo quand meme s' caleur, certaines mauvaisses langues rajouterotent " cha t'faijo perte tes aiguiles" ......

vlà , j' m artrouffe dans la froidure, pas loin d' ché 2 lessiveusses

j' leur parle pas, mi j' su vesqué d' ét' là, j' conno min sort , demain matin, y a passache des poubelles, et j' va finir dins l' benne sans un dernier regard ...

arriffe le matin, acoutez j' peux cor vous l'raconter comme si chéto hier, j' vo ch' père em'ner l' premiere lessiveusse such' trottoir ..

arvenir pour printe l' deuxieme lessiveusse pour ch' trottoir

i s approche d' mi, j' freume ché ziux, adieu mes gins j a eu ker viffe ichi avec vous

mais j' rouffe vite mes ziux, in va pas vers l' rue, im' dépose à coté del porte del barraque et i s in va

j' vous avoue que j a pas trop osé crié victoire, mais au momint que j' commincho à busier sur min destin, j'el vo arvenir avec minloute

i va ouvrer l' porte del barraque , printe ch' louchet , pi sous les ziux d' minloute, creuser un trou dins ch' gardin

acoutez quand qui a fallu qui dessaque mes racines dech' pot, j' vous jure que j a tout fait pour que cha s' passe au miu, j a bloqué m' respiration, y a eu qu à saquer 2 coups et j' m a laissé faire

i m a mis alors ch' pied dans l' sol, armis del terre autour, bin tassé, pris un arrosoir et m' donner un peu d io

ché pour cha mes gins que j a pu aujourd hui vous raconter un vieux souvenir qui date , escusez me à eune année près j' sais pu , mais pour mi cha do et' vers 1971 1972 qu in m a planté ichi , dins ch' gardin

années aprés années j a pris mes aises, grandi, j' m a meme élargi , que ch' vigin y a coupé mes branques qui allotent ché li, faut dire que j avo ker m étaler

j' dijo rin , j éto arvenu à mon état naturel, pour quo j avo été planté, pousser tranquil'mint et sur'mint et donner un peu d ompe ach' gardin

j éto pas l' seul dans l' coin, dans pas mal d' gardins au fil des ans in a pris d' la hauteur, arrivant presque ach' faite des masons

in avo toudis un peu l' coeur serré chéto au momint d' la noel pasque in savo que nos futurs collègues sapins , i n aurotent pas not' chance et qui finirotent eux chéto sur par et' embarqués par ché poubelleux ......

ché pour cha que j' su pour que vous acatiez des "faux sapins" savez ceux qu in peut réutiliser chaque année

comme cha vous épargnez la vie d' pauv' sapins qui finissent dins ché poubelles durant chte semaine qui arriffe

ché sur que ché sapins en plastique i sentent te pas, par conte i zont un sacré avantache, zavez deviné ?

Bin i pertent pas leurs aiguiles................

bin que belle fin d'vie qu'ya eu tin sapin , apres avoir passé chés lonques journées avec un diape comme ti
mi aussi ch'faijos toudis un vrai sapin et ché mi qu'yallot l'querre , et j'em'faijos toudis ingueuler passe qu'yétot trop grand , ché vrai qu'chés plafonds y z'étotent moins haut in 1972 quand qu'j'ai acaté m'barraque
et à chaque fos bin sur j'étos obligé ed' coper ch'pied , chétot un régal pour chés yux d'mes infants , et pour nous aussi bin sur , pi un plus pour nous chés VIUX chétot surtout l'occase ed' faire in tiote soirée , attintion j'ai pas dit qu'in attindot l'noël pour cha , heureusemint d'ailleurs , in arot eu l'temps d'avoir soif
ach'teur ed'pu 8 ans ché un sapin un plastique , et à part chés clignotants ché vraimint pu bieau

bin comme je cros avoir deviné l'maison à ch'tiot minloute sur gogole mapps , ej pinss aussi t'avoir vu , t'es devenu un Monsieur Sapin si ché ti!