surette ou pas surette

chéto l' question du diminche ou du lundi soir, quand que m' mère ale avo fait du bouillon la veille à midi..... qu in in avo mingé la veille au soir .......

y en resto toudis un fond ...m' mère ale raviso min père tout in faijant eune tiete qui voulo qui réponde "non" et ale li dijo " i reste pu qu' cha comme bouillon ,jel' jette ?"

mon diu quo qu ale avo pas dit m' mère ......

faut dire qu' min père meme si zallez vire i allo "accentuer ch' trait" , dins l' fond i avo pas ker mais alors pas ker gacher .......

savez quand qui a été jone, y a pas toudis connu des momints faciles, et un sou chéto vraimint un sou

après y a eu la guerre, et meme si yéto pas du tout radin, i avo pas ker jetter al' poubelle del' nourriture

in avo pas interet meme par arflexe d' faire des boulettes avec l' mie du pain, mon diu, i vous in auro artourné eune , et là ché pas eune formule ....................................

donc pour in arvenir au rituel du bouillon qui avo tro jours, cha commincho par m' mère qui li présinto l' fond del marmite d un air que chéto pu si bon qu' cha ....

mais qu' min père i tindo ses bras en l air, in dijant "malheureusse, in va pas j' ter del nourriture, mon diu que malheur"

y a des coups et chéto là les aléas d' mette al' caffe ch' reste du bouillon, yavo des jurs du que ch' bouillon i yéto plus vite suret qu à d autes momints

j' me souviens d un coup que m' mère ale avo donc du récauffer l'reste du bouillon et là cha sinto VRAIMINT que cha avo tourné, et que chéto suret ....

m' mère ale a bin tenté un dernier coup in ram'nant l'fond del castrole del disuader d' pas l' minger

et là min père i éto parti dans un numéro savez comme ché zacteurs au début du cinéma parlant et qui avotent gardé un jeu d' scène accentué ........

j' arvo l' scène........li d un air "un p'tit peu dédaigneusse " comme i dijo li meme, i tindo sin index vers s' n assiette creusse pour que m'mère ale i verse ch' fond du bouillon

c' qu ale faijo mais d un air géné, comme si in plus ale avo peur que cha li gache s' santé ...............


et quand que m'mère ale arparto al' cuisine in dodelinant l' tiete d un air ed' dire " in va pas l' canger ché impossipe ....." ..........

min père ch' coup là i print eune cuillère d' bouillon et y l avale, mais là ch' coup chi ale éto plus que surette, y s a tout d'suite énoqué ...................

m' mère ale arriffe tout d' suite , à pu savoir quo faire, pour vous dire ch' bouillon i li éto arsorti escusez me d avinche par les trous d'nez

mi j éto plié d' rire, m' mère elle, ale savo pas quo faire, min père i li dijo d' taper dins sin dos, bon vla qu as' met derriere li , mais ale tape pas, ale tapote à peine ..

min père qui s énoque cor plus , qui li crie "mais tape que j' te dis" , m' mère qu ale tape à peine plus fort ...

eune fo qui s éto armis d' ses émotions, m' mère ale li dijo " ah t as voulu faire ch' malin avec ch' bouillon , té tin est énoqué"

min père "pas du tout, mais alors pas du tout, si j' m a énoqué ché pas à cause du bouillon mais à cause d' ti que t insiste toudis pour pas mel servir et que j'su obligé d'montrer qui ché ch' maite ichi ....."

cha jel savo par coeur sin numéro d' mauvaise fo, d ailleurs personne i éto dupe , meme li d ailleurs

chéto sin coté "théatre aux armées" qui quequ' fos éto un peu soulant pasque cha arvéno au moins 2 fos par mo ch' t histoire d' suret ........

mais savez j' voudro bin m artrouver là dins l' salle à minger , al' raviser faire sin numéro ............

d'su l'coup quand j'ai vu ch'tite , j'ai tout d'suite pinsé à d'l'oseille qu'in appelot aussi surette , in allot voler cha din chés gardins pour el minger tout crute

j'cros qu'in est grammint qu'in voudrot s'artrouver autour d'el tape avec ses parints , frères et soeurs , cha nous rajeunirot bin sur , mais j'cros surtout qu'artrouver ch't'ambiance cha s'rot formidape

pour arvénir ach'te bouillon qu'yavot suri , ya 2 mos inviron em'femme al avot fait des chicons au gratin , ché t'in d'mes régals , et pi comme tin père minloute j'ai horreur du gaspillache et d'jeter d'el bouftance
et donc comme y in restot j'ai armingé el lendemain , et comme y in restot cor j'y ai dit "garte le pour ed'main" , mais l'quatrième fos chétot suri , j'l'ai mingé quand même mais ché vrai qu'ché moins bon , faut dire aussi qu'chétot ech'début d'ech' "surissache"
si j'avos été ach'même point qu'tin bouillon, j'l'aros suremint pas mingé