l' arrivée d' Simone

nan, Simone ché pas eune matante ou eune cousine que j' auro oublié d' vous parler, cha m étonnero vu que cha fait plus d' 6 ans qu' au gré des histoires , vous comminchez à connaite min entourache ...

nan , nan, Simone , zavez d' viné, chéto l' nom du premier salon qu in a eu

et cor quand que j' vous dis salon ,j' devro vous dire un canapé convertipe , avec 2 fauteuls , ouais mes gins ...

j a oublié d' vous dire que chéto pas in cuir ni en tissu qui yéto ch' canapé ...

nan , nous chéto cor miu qu' cha , i éto en bébé skaille , ouais le bébé skaille , ché pas comme l' bébé phoque, chéto pas eune bete protégée

la preuffe, le skaille, avec l aven'mint du pétrole et d' ses dérivés, chéto le meuste ...


tel' trouvo aussi sur ché sieches d' carette, par conte j' su sur que rin qu à ch' t évocation d' cha, cha vous rappelle des souvenirs qu in pourro dire "cuisants" .........

vu qu in s a tous assis sans faire attintion, dans eune carette garée en plein solel, surcauffée, au retour d' la plage, in short , et qu in s a arlévé tout d' suite vu que chéto aussi caud que si in s éto assis such' bord dech' fourneau

donc not' salon chéto en skaille, un bio skaille noir qui luiso
avec des gros boutons par indrots que cha faijo un motif

j' vous a mis ichi en piece jointe, un salon qui li arsempe beaucoup, ché tiré d un cacaloque Manufrance datant de 1972


nous ch' canapé et ché 2 fauteuls in a eu cha en 1969

avoir un canapé et 2 fauteuls, chéto l' début vraimint du confort, bin ouais in auro pu rester à raviser l' télé assis al' tape comme qu in faijo avant ...

nan nan, là chéto comme chi, cha peut sembler drole asteure, chéto comme chi in éto riche, comme si in pouvo s' payer quéquosse j' allo dire d' superflu , in tout cas quequosse d' confortape

quequosse d' confortape avec un tchiot peu l' sentimint au départ que chéto un peu un hymne à la paresse

mon diu qu in éto bien d' dins , cor dijo m' mère, "in pourro meme freumer s' neule rapid'mint"

ale éto voyante pisque queques zannées , queques décénnies plus tard, ché sur qu in début d aprés midi , m'mère ale allo s' indormir réguyer'mint en ravisant Stefan, connaissez pas Stéfan ?


ch'est l' prénom d' l inspecteur Derrick, savez l' roi des feuilletons soporifiques d' début d' aprés midi ...

djà qu un canapé , convertipe j'arprecisse, et 2 fauteuls chéto la classe , que dire des zautes cosses qui avotent été livrées avec


yavo un pouf, cha chéto pour min père, d'sus i placho s' gampe raite, comme cha i pouvo raviser tranquil'mint l' télé

pire encore , in avo in plus, eune table basse , rectangulaire, en métal noir, moderne, que d'sus chéto un plateau in bo arcouvert d' carreaux émaillés qui arprésentotent plusieurs amphores ...

ouais ouais cha en j'to mes gins

mais chéto pas fini, yavo aussi et là chéto le lusque du lusque, quequosse qui en jetto, qui éto pas indispensape, chéto l' bar roulant

ouais comme dins ché flimes américains , bon y a jamais grinmint roulé, j' diro meme qui a pratiqu'mint pas bougé, j' vous mint pas pendant .......près d' 40 ans , in auro pu l arvinte au bout du compte , i éto toudis comme neuf

d' dins in metto ché bouteles d apéritifs, et aussi queques bouteles d' liqueur, mais al' mason ché bouteles d' liqueur cha duro 10 ans au moins, in éto pas des carnassiers à cha, à part ptete l' boutele d' calvados qu in a du boire au bout d' plusieurs années quand meme

al' mason chéto recta, nouviau matériel, nouvelles consignes ....

savez djà que alleumer l' télévision chéto EXCLUSIV'MINT réservé à min père, i déléguo cha quequ'fos am'mère si ale passo d'vant l'télé mais comme ale éto stressée d' pas faire eune bétisse, faut dire aussi qu' min père i éto pas très psycholoque dins ché momints là, i s enervo vite, alors ale perdo vite ses moyens ...

donc interdit d'venir minger un sandviche, un bout d' pain un gatiau quand qu in éto dinch' canapé , meme ch' tien y a fallu qui attinte un bon momint , queques zannées pour voir monter such' canapé et cor , y avo des couvertures du qui s installo

alors imaginez ch' premier soir , m' mère dins ch' canapé, min père dins ch' fauteul du miyeu, mi dins ch' fauteul d' droite, assis à nos plaches, à caresser ché zaccoudoirs, j allo dire installés dins ch' salon , in peut dire , savez in a tous un tchiot peu d orgueil dins ché momints là, in avo plutot l impression d' troner plutot qu aut' chosse .....

ah bin voilà , y'avot un pouff, pasque ej pinsos et arpinsos à Monsieur Léonce , je m'disos que cha devot pas ett comott pour li ech 'canapé ou ch'fauteul..
bin , alors i minquot pus que ch'téléphone dins un salon parel, ché pour quand l'installation??

Mes parints quand ils l'ont installé, em mére al disot toudis à min pére, "in n'avot pas b'soin d'cha , i sonne jamais!" al donnot ch'numéro à personne non pus..