la télé couleur

meme si l' télé couleur ale est arrivée en France en 1967, j' do dire qu in a attindu un bon momint al' mason pour in avoir eune

d' abord eune télé, in a connu cha qu en 1969, j' me souviens qu in raviso un feuilleton qui s appelo "les 7 de l escalier 15" et l'premiere imache qu in a vu chéto "yao" , un feuilleton qui s' déroulo en cote d ivoire et qui raconto la vie d un jone garchon , YAo, qui doit fuir sin villache et partir vive dans la foret du qui a del sorcellerie, avant d arvenir au villache pour punir chti qui avo tué sin père .........

l' télé in couleur, in l a vu quand qu in allo passer queques jurs ché eune tante à min père qui vivo en région parisienne

alors j' me souviens qu in trouvo merveilleux, in voyo les memes émissions par conte , mi cha s'semblo aussi bio qu au cinéma ...............

ché couleurs par conte chéto pas cor vraimint cha , j' me souviens d' reflexions d' la tante, qu ale dijo " bin chelle ci ale a grinmint bronzé" ou " an' na mis eune tonne d' rouge à lemes"

ché sur que les rouches étot souvint plus que rouche vif, et toutes ché couleurs plus que soutenues ....

chez la tante in raviso la télé mais uniqu'mint quand que cha l interesso ELLE

mais un coup , j' sais pas c' qui li a pris, un remors ? un sentimint d' culpabilité ? j ' iro pas quand meme jusqu à del gentillesse .............

mais in a eu dro, j a eu dro à raviser un ouesterne l' soir , un ouesterne mes gins EN COULEUR

vous dire qui qui juo d' dins à coup sur, j auro du maux, am' mote j' diro Grégory Peck ,mais bon j'su pas sur d' min coup

j' me souviens qu au début du flime, yavo un coboille qui traverso eune riviere (del couleur du canard wc) au loin yavo ché montanes enneigées qu in auro cru que chéto du dentifrice tel 'mint cha paraisso plus blanc que blanc

ch' coboille i s apprecho d eune mason construite en rondins, ch' cinsier i porto eune quémiche à carreaux rouche (plus que vif) et s' femme ale porto aussi eune tonne d' rouge à lemes

en arrivant à coté du chalet , y a déchindu d' bidet et y a donné un coup d' main à ch' cinsier pour artirer eune souche que l aute cha faijo un momint qui essayo d' l artirer ...

ché tout c' que j' me souviens dech' film , mais bon ,ché déjà grinmint

aut ' cosse qui nous semblo , in tout cas que mi j' dévoro, chéto un magazine hebdomaire dédié uniqu'mint à la télévision , si si cha s appelo télé 7 jours

j avo ker l' lire in larche et en travers, cha m' cangeo du résumé hebdomaire des plus striques qu in trouvo dans le journal la croix du nord qu' min père i preno in plus d' la voix du nord , du qui yavo simplemint l' tite des films ou des feuilletons , tandis que dans télé 7 jours, yavo un réseumé d' chaque flime , et meme que chéto noté avec d' zétoiles .....


quand qu in arveno al' mason, la télé ale me paraisso fade mais que voulez , y a fallu qu in attinte eune paire d années, et quand que j' dis eune paire d années, bin plus que cha, vu qu in avo acaté eune RADIOLA ..... pour qu in puisse nous aussi profiter d' la télé couleur

alors mes gins , eune télé couleur, dans eune pieche du qui yavo ch' salon modèle Simone ,chéto l' début du lusque .....