Prinmier Amour de Jean Dufossez

PRINMIER AMOUR

Brassens l'a dit : Jinmais d'la vie in n'l'oubliera ,
El prinmièr' fill' ed tout ,qu'in a pris dins ses bras .
Sur tes lèv's ,t'as permis qué j'dépos' un baiser ,
Fleur éclos' ,qui n'démindot qu'à èt' butinée .

V'là pus d'chinquant' ans ,combin d'fos jé i est busié ,
Modest' homach à tes sens à pein' révélès .
Cha fût tout . Ed Platon in a té les discipl's ,
Nous in étot trop bin él'vés pou qu'cha s'dissip' .

Queul emphas' autour d'un baiser ,tout prim'sautier .
T'aros seur'mint d' siré ........Qué j'seuch' pus déluré !
Un baiser ch'n'est rin du tout ......Pour vous j'sus un drôl' ,
N'impêch' qué ch'étot pour nous ,un trésor qu'in vol' .

Prinmier amour après l'manman ,jeux interdits ,
Qui m'a fait vir l'espoir ,d'aut's ,biaux Paradis .
Sûr , un aut' après ti ,a fait d'mi un adult' ,
M'a fait découvrir ,el momint où l'corps exult' .

L'union rêvée , qui au septièm' ciel nous hiss' ,
Dont jé n't'avos fait intrevir qu'les prémic's .
J'n'ai p't'èt' été qu'un nom sus tin tableau d'chass' ,
Pour mi , crîm' impuni ,qui depuis m'imbarrass' .

Numéro anonym', sus ch'cahier d 'écolier ,
Sins mêm' un astérisqu' , mêm' pas souligné .
Cupidon ,responsap' ed not' amour furtif ,
V'l'à ein' bonn' raison si ch'n'est pas un motif .

Ej busie souvint à ch't' instant merveilleux,
Qui fit d'nous ,ch'n'est pas autermint : deux amoureux .
In'd'arot fallut d'peu chos', pour qué té fus mienn' ,
Ti qué j'n'oublierai jinmais ,m't'chiot' collégienn' .

Jinmais ,nous n'ming'rons insann' el fruit défindu ,
El flêch' qué Cupidon a lincée ,s'est perdue .
Sur nous ,el cours du timps a laissé s'n empreint' ,
Mais rin ,n' nous f'ra oublier not' étreint' .

Si d'avintur' ,au détour d'un quémin ,
In s'artreuv' ,in s'dira bonjour ,in s'serrant la main .
In d'vira d'tout cha ,avec infinimint d'tindress' ,
Et d'tout ch'qu'in aurot put fair' avec promess' .

J'espèr' qué , l'jon' con qu'j'étos , n't'as point fait souffrir ,
J't'in d'mind' pardon et j'espèr' t'vir fair' un sourir' .
El viux con qué j'sus aujor'd'hui , ed dit merci ,
D'l'avoir d'si douc' façon ,éveillé à la vie .

Pindint el'court instant dé ch'tiot poêm',
J'ai r'treuvé el passion , qu'in a quind in aim',
T'as été el mus' dont m'n'esprit fût obsèdé ,
L'attindrissant souv'nir des années passées.

Jean Dufossez