l ' arrosoir in fer

ch' est en m' prom'nant par ché mi que j a qué la d' sus, vous raviserez l' photo , mais ché plutot original d' mette in décoration d' chaque coté d un pilier d entrée, un ancien arrosoir in fer, meme si asteure y a été peinturluré ...

cha m'a fait busier que comme tous ché zéfants , chéto un peu "met l' brin la gazette" , j' m occupo d' tout, j' voulo tout bin faire, quequ' fo au delà des zespérances d' mes parints et là voyez cha a été eune leçon dure à avaler

j' vous jure que cha parto d un bon sentimint, j' m eto dit , tiens j' va aider min père, vu qui est parti à eune réunion et que j' savo qu in rintrant i allo devoir arroser ch' gardin

mi , dans un instant d' bonté, que j a argretté après d ailleurs, eune fo qu' min père i avo tourné au coin del rue avec s' carette , mi j' m a précipité au gardin pour commincher à arroser

d' abord croyez pas qu in éto du ginre à mette un arrosoir sous un robinet, à tourner l' manette, à attinte que l io ale rimpliche l' arrosoir pour freumer l'dit robinet et aller arroser

nan nan, in ouvro ch' robinet d io pour arroser que si vraimint chéto necessaire , fallo pas gacher, chéto l' leitmotiv d' min père

donc pour cha i avo des grantes lessiveusses in fer qui étotent au bord du gardin, camuchées d' la vue par un grand forsithya

quand qu in prenno son bain l' samedi, pas question d' vider l' bassine aprés dins l' caniveau , mon diu que malheur ...

nan nan , min père i prenno des seaux et y écopo toute l io del bassine qui ballo dans ché grantes lessiveusses

d' ailleurs cha a été longtimps eune question que j' ma posé, min père i arroso ché légueumes qu on mingeo avec de l io du bain du qui yavo du savon, am' mote que cha devo et' pas si mauvais qu' cha, ché que ché legueumes i poussotent quand meme

mais arvenons ach' gardin, mi tel' mint que j' voulo faire bin, au lieu d' printe ch' seau in plastique et l' mette dans l io del lessiveusse, l armonter et l' vider dans l arrosoir, pour après l' déplacer pour arroser ché plantes ....

nan , j a eu l' idée, in tout cas l' mauvaisse, ou l' fainéantisse, ou cor l' manque d' jugeotte, d' mette directemint ch' l arrosoir dans l' lessiveusse

chéto rigolo del' mette à plat et d' vire l io rintrer rapid'mint à l interieur, et mi j el rattrapo quand qui éto cor à moitié rempli

pasque voyez si ch' seau que j a pas voulu utiliser y éto en plastique, autant ch' l arrosoir i éto in fer ...
zavez compris que chéto pas l' meme poids ...

mais nan, pour l instant cha allo,j'sorto l' arrosoir toudis à temps quand qui éto à moitié plein

que vous dire, est ce que cha a été l' euphorie, l' joie future d' pouvoir dire à min père, "ravisse j' t a avinché dans tin traval", qu à un momint, j a laissé l arrosoir plus longtimps que d habitute

cha parto cor d eune bonne idée, plus l' rimplir pour pouvoir arroser l' maximum d' plantes avant qu' min père i rinte , pi l attinte fier'mint au coin du gardin, l'torse bombé, près à archevoir eune médale ou tout au moins des félicitations

hélas babilasse comme dijo min père, emporté par m' n euphorie, j a laissé l' arrosoir s' rimplir au 3/4 et là vu qui a été plus lourd d un coup, j a pas pu l artenir, et dans un dernier grand "gloups", quand qui s a rimpli complet'mint d io, y a parti vers le bas , hors d attinte d'eume main

im ' n argo ch' l arrosoir, car y éto pas complet'mint au fond i semblo "nager entre 2 eaux" in tout cas i éto pu attrapape

là j a bin essayé d' l attrapper en armontant l' manche d'em quémiche, vous m' connaissez assez asteure pour savoir que bin sur j a réussi à mouiller l' manche bin sur

la situation ale deveno critique, min père i allo rintrer d un momint à l aute, j avo djà fait un tour dins ses outils, ramn'é eune binette pour essayer d accrocher l'anse d' l arrosoir, impossipe mes gins ...

deuxieme suée, j va querre eune tchiote serfouette, meme résultat

et bin sur , ché ach momint là que j a intindu l' carette d' min père qui tourno au coin

là , repli stratégique, au moins ranger ché zoutils que j avo ram'né autour d' mi

et j a vite filé dins l' pature qui avo dins l' rue avant qui arvienne du fond del rue leverrier du qui allo met' l' carette dans son garache

chéto bin sur arculer pour miu sauter, pasque quand que j a arvénu al' mason , à peine que j avo arpasser l'tchiot portail et que j' voulo rintrer vite fait al' mason pour éviter min père qui éto dinch' gardin, que bin sur i m avo vu rintrer ou j' cro surtout qui m' guetto

j' m a fait ingueuler, j' vous dis pas, surtout que quand qui m avo d'mindé pourquo j avo j'té l arrosoir dins l' lessiveusse, j avo osé dire que chéto pas mi, enfin j' voulo dire que j' voulo en fait l aider dans sin traval, mais comme j m' éto immélé dans mes explications, j a eu dro à eune clique que cha m a bin cauffé les fesses durant un bon momint

sans oublier qui m avo privé d' mon argent d' poche d' la s'maine

et savez l' type d arrosoir que j avo laissé querre au fond d' el lessiveusse, chéto exactemint chti del photo ...

ché peintures bariolées en moins ...

Mi j'ai exactemint el même, mais à l'état nature, sans peinture, y vient ed min père, j'ai cor avec el pomme d'arrosoir....