les tubes d' colle scotch
par minloute le, 26/08/2012j va pas vous parler des pots d' colle blanque qu in avo à l école, savez ché pots d' colle que cha sinto bon à l ' intérieur et qui yavo eune tchiote pelle in plastique pour déposer l' colle "délicat'mint" derriere l' feule à coller ..
"délicat'mint" escusez me d' attarder un tchiot peu, mais mi "délicat'mint" j a jamais su, à croire que j avo des génes d' maçon... j utiliso l'tchiote pelle comme d eune truelle
j in metto tro fos d' tro, cha faijo des patés, alors mi ni eune ni deusse, pour pas qu' cha dépasse, j appuyo un grand coup eune fo ch' cahier arfermé pour que cha dépasse pu
cha dépasso pu, ché sur , mais y a des coups quand que j' voulo ou plutot quand que j' devo rouvrir l' pache pour réviser l' lechon, bin chéto impossipe ...l' pache ale éto collée ...
mi m' colle préférée chéto l' colle en tupe, la colle scotch, d abord t éto pas obligé d in mette autant que l' colle en pate, pi cha collo sec
cha sinto cor meilleux comme odeur, y a meme des coups in s in metto in tout p' tit peu sul' bout del lanque , mais un tout p'tit peu sinan cha t inflammo t' guiffe
nan , pi chte colle in pouvo juer avec quand que ch' maite i avo d' dos tourné...
té métto sur tin bras du stylo bile rouche , pi té metto par dessus un tchiot peu d' colle , aprés t étalo un tchiot peu, cha commincho à séquir et en séquant cha faijo des fripures et cha donno l impression d avoir eune cicatrice
chéto à chti qui avo la plus belle, bin sur tout cha fait et comparé en cachette ....
bonne colle la scotch, quo que voyez, mi j avo deux mains gauches, expliquez me mes gins , expliquez me pourquo chéto A MI que cha arrivo ...
j avo toudis l' pointe du compas qui v'no perforer ch' tupe d' colle, et bin sur cha s écoulo dins l' trousse, oh pas des lites bin sur, mais cha suffiso à coller des stylos biles inter eux, et pire encore, savez ché stylos bic qui avotent l' tupe d' couleur jaune, chéto des pointes plus fines que ché tupes qui étotent transparents...
mais voyez l' plastique du stylo bic jaune chéto plus fragile , in tout cas cha réagisso plus vite à la colle scotch, cha deveno filandreux avant qu' cha séque
j' sais j in sais des chosses mais savez mi i m arrivo toudis des malheurs comme cha, j in parlo am' mère en rintrant d' l' école ou plutot ché elle quand que j' devo corriger mes fautes et que quand qu ale ouvro l' trousse ale risquo toudis d' querre in syncope ...
faut dire que mi j éto et j' su toudis pressé, ya toudis quéquosse à faire, voyez quand que chéto l heure del récré ou d'la fin des cours en primaire, bin j' ballo tout dins m' trousse, alors que voulez vous ...
ch' compas lancé in vrac qui vient percher l' tupe d' colle, ou pire encore quand que en meme temps min tale crayon qui s ouvro et que ché copeaux is' mélangeotent avec l' colle, chéto pas mal non plus
que voulez vous, mi j avo "passable" "peut mieux faire" ou alors ch' maite i dijo " j t a artiré des points vu commint qu' tin cahier y est tenu"
in va m arfaire ...