Leçon de Rouchi ''Vaut mieux s' taire !'' de Jules Mousseron
par PAILLART André le, 09/09/2012Mes gins, v' là chi eune histoire amusante de Jules Mousseron, père sprituel du célèbre Cafougnette, que j' vous fais partager.
Ale est écrite in " Rouchi " l' patois d' nous région .
J' l'ai trouvée intéressante, notammint sus l' forme d' écriture et l' grammaire d' nous langage, bin souvint plus facile à parler qu' à écrire.
Eune bonne leçon à arténir pour les néophites du genre décidés à prinde la plume pou s' lancer qui sait.
Juste eune précision, la gente féminine risque de rire jaune in lisant ch' t' histoire et j' min excuse auprès d' elle, ché pas mi qui l' a écrite ...
" Vaut mieux s' taire ! " de Jules Mousseron
Cha n'est point biau, au cabaret,
Ed toudis dir' du mau des femmes,
Surtout quand l' sienne est là tout près...
In est souvint arfait au même.
L'autr' jour, un cabartier d' l'indrot
Y-in disot su s' femme' pir qu'à pinte,
Pindant qu' li, l' sans cœur, i buvot
Et qu' elle, all' rimplissot les pintes :
" Les femmes, qui disot c' mal appris,
Ch'est l' pus vilain' race ed' la terre.
El preuve ed chu qué j' vous dis chi :
Ch ' t' avec cha qu' in fait des belles mères.
" Eun' femme, ch'est l' femelle du grisou.
L' malheureux garchon qui s' marie
F'rot mieux dé s' mettre el corde au cou
Pou finir pus gaîmint sa vie.
" Ah ! mi j' peux dir' què j' y-ai r' kaiü
Comm' femme ! In n' peut pon point trouver pire.
Ch' t'eun'punition qu'in m'a mis d' pus
Pour mi gagner l' palm' du martyre !
" All' n'arret' jamais d' bertonner.
El diap' li mêm' né l' f' rot pas taire !
Li confier un s' cret, ch'est mucher
S' porté-feuill' sous eun' plaque d' verre.
" Alle est " à-s bouq " comme une roux cat :
All prind des cuit's carabinées
Pou nommer les défauts qu' alle a
I m' faudrot pus d' eun' gros' journée !
Ch' ti qui prind m' femm', j' li fais s' pinsion.
J' li pai' tout c' qu' i veut, mêm' ses dettes !
Et si, par hasard, i tient bon,
J' li donn' rai cor pou ses buvettes ! "
Là d' sus, d' vant tout l' monde réuni,
S ' femme all' s' écri dé s' voix l' pus haute :
" Parl' donc ! si t'es dégoûté d' mi,
Gros malin, n' dégoût' point les autres ! "
cha devot vraimint ête un vrai calvaire qu'ya subi ch'pauf malheureux
j'ai bin apprécié l'réponse d'el mitant d'sin lit , comme y dit jean marie