Les jardinsmin fond d écran
par minloute le, 29/11/2012j a mis en fond d écran eune viele carte postale d' Merlimont
j a ker ché photos là , savez du qu in est venu arcolorier par chi par là , pour donner eune imache , j' diro plus vraie qu' nature ....
j' l' a ker pasqu in vo l' déchinte pour aller à la plage, ché eune photo qui a été prisse avant l' début des années 60 du qui yavo su la plage chés installations du State Becquerelle et d' l' aute coté les Pinguins ...
j' l a ker ch' te photo pasque in vo à la fois ché cabines individuelles, bin plus jolies am' mote que chte barre d' béton qui zont mis aprés et du qui yavo des cabines toutes pareles
mais aussi pour ché tentes individuelles, nouzautes in avo ,quand que j' dis nouzautes, ch'est à la fois mon mononque et min père, in avo eune cabine pi aussi eune tente individuelle
l' tente chéto du solite, fallo et' au moins à deux pour l' mette en plache, sans compter ché zinfants , qui devotent s' coltiner ch' maillet et ché sardines in bos qu in devo utiliser pour que l ensempe i tienne au vint
l' tente comme cha j allo dire , chéto comme si chéto not' territoire à nouzautes, ché des souvenirs qui comminchent à dater, près d' 45 ans, mais j a toudis eune pensée pour ch' te coin, pour chte station balnéaire, du que j a grinmint jué, du qu in allo s' baigner, cacher ché coques , péquer ché crevettes pi juer au fond des baches ...
cha m'fait drole ed pas vire cheux sus l'plage à vintt leur barda... autre temps, autres moeurs
( 1 photos)
