19h au soir , l' jour d' Noël
par minloute le, 25/12/2012m' mère ale avo posé l' question taleure avant qu' min père i arconduisse tout l' monte, "qui ch'est qui arminche ch' soir?"
ale dijo cha comme eune corvée, non pas comme eune corvée à arfaire à minger , pasqu ale éto tel'mint habituée al' faire, mais que cha la dégouto un peu d' vire qu in éto cor plusieurs à pouvoir avaler quéquosse ...
yavo mes soeurs qu ale mingeotent cor léger, qu'as' contintotent d une "feule d' salate" avec del dinte froite
yavo ché costauds comme min père et mi, qu in pouvo avaler cor eune bonne assiettée d' crudités avec des tranches d' charcuterie....
pi aprés, comme es'zautes , in mingeo del dinte froite, avec del bonne mayonnaisse que m' mère ale avo cor l' courache d' faire ....tout cha avec del salate
parel comme chaque année, j avo dro à "li y est vraimint brindzingue, y a pas ker l' dinte caute, et là quand que ch'est del dinte froite, i s' jette d'sur comme un tchien sur un oche"
que voulez vous chéto la vérité .....
tout cha bin sur arrosé pour min père d' vin rouche d' bouteles entamées durant ch'repas, et pour mi et l'reste del famile , del biere bock en litre...
min père et j' do dire mi et mes soeurs, in mingeo un tchiot morciau d' fromache
sans parler des courageux, dont j éto pas, qui continuotent avec un bout d' tarte au libouli, cor que cha m arrivo d in minger cor un morciau un peu plus tard .....
m' mère ale nous servo , comme si ale éto coupape, persuadée qu in allo avoir l' vinte qui allo exploser vu tout c' qu in avalo
et in avo dro al' phrasse "mon diu mais du qui mette cor tout cha"....