malate

M'ame Facon ale ravisse M'ame Froment et a li dit "y est pas bin ", M'ame Froment ale vient mette s' main su min front, ch' est tout caud

mi j'a 6 ans, j'su dins l' classe d' Madame Facon à l' école Loubet , j a mis m' tiete su mes deux bras croisés et j' su mate

allez, in y va qu ale dit M'ame Froment, ta manman ale do et' at' mason ?

j a du dire ouais,et nous vlà partis, mi bin inmitouflé , surpris quand meme d' quitter mes camarates d' classe en début d' aprés midi

faijo mauvais temps, yavo del neiche j' me souviens, et nous vlà parti comme 2 malheureux , armontant la rue d'Denain, pi la rue Raymond Deruy

on traverse l' rue nationale et nous vlà bientot al' mason, sauf que, meme en buquant al' porte, en ravisant par l' farniete, y a pas personne

M'ame Froment ale est imbétée , et j y dis que y a Marraine, qu' ale habite juste un peu plus bas

nous vla chi en train d artraverser l' route nationale, et là rin que par l'leumiere alleumée qui a dins l' pieche du miyeu in sait qui a du monte

M'ame Froment ale buque al' porte, in vient li ouvrir, un peu surpris d'em vire là aussi, mais j vo tout d suite qui yavo m'mère qu ale éto là

ale éto vraimint inquiete dem' vire arriver chi

j arpars rapid'mint al' mason avec elle, après que m' mère ale a bin armercié Madame Froment

ouais j a oublié d' vous dire depuis l' début que l' maitresse chéto Madame Facon et que Madame Froment chéto eune aide maternelle

m' vla donc al' mason ,min père i devo et' là vu qui éto djà en r'traite , in tout cas j' sais qui va à mon d' chez Louise Defernez pour téléphoner

Louise Defernez, j in a djà parlé souvint, ale teno un magasin d' bonnet'rie , d' artiques scolaires ,sans oublier ché artiques funéraires , tout cha sul' route nationale pas loin del mason

et ale avo , et chto bin rare à l époque, comme in plus d'tenir ch' magasin ale éto infirmie..... attindez j' va faire eune tchiote pause
j' pouvo pas dire qu ale éto infirmiere, in diso plutot que chéto la "piqueuse" , ch'est la meme chosse direz vous, mais chéto l' terme imployé

et comme dijo m' mère bin d'zannées aprés quand que cha nous arrivo d' parler de Louise Defernez qu ale éto piqueuse, ale ajouto toudis " mon diu que malheur, pour qu ale trouffe eune veine ,ale piquo dix fos autour" ...

m' n apparté fini, j arprinds m' n 'histoire que min père i éto donc allé à mon d' chez Defernez pour laisser un messache au dispensaire, pour que , ch' docteur, dins l' tournée qui f'ro au matin i puisse venir al' mason

mi al' mason j' devo et' bin malate, j devo avoir au moins eune bonne fieve, vu que m' mère ale éto vraimint aux bons soins avec mi

j' passe l' nuit bon an mal an, j a eu tout caud, j' m a réveillé, m' mère ale m a cangé min maillot d' corps, et nous vlà chi au matin, l'vé tot pisque ch' docteur i allo passer

8h pas personne, 9 h pas personne, alors là min père y a dit ch est pas la peine d attinte, là i do avoir pris ses consultations à mon dech' dispensaire

j a oublié d' vous dire, mais connaissez à connaite l' caractère d' min père depuis l' temps, i dijo cha in ralant ...