ch' grauet

ch'est en ravisant sur le site histoires de chtis qui a sur internet , yavo l' leçon d' patois de Guy Dubois sur le mot "grauet"

cha m a rappelé ch' fameux outil qui yavo dins l' barraque d' min père

mi j a toudis été d eune imagination débordante, et suffijo que j' vo un flime ou eune série al' télé que cha m interesso que j' me preno pour le héros

j avo ker quand que j éto tchiot eune série télévisée qui s appelo "thibaut ou les croisades" , chéto un chevalier qui éto parti avec s' n écuyer vive des aventures du coté de jérusalem quand que chéto bin sur l' temps des croisades ......

batailles, rixes, cavalcades, coups d épées, bruits d' boucliers, j éto am'n aise .......

mais voyez , autant j avo des pistolets en plastique, j a du avoir aussi l' coyer en plastique et l épée d' thierry la fronte, mais am' mote j avo djà du l' casser d'puis un bon momint...

autant que j éto "équipé" pour juer au cowboy , autant pour juer au chevalier, j avo pour ainsi dire pas grand cosse ...

j' vous avo dis que j avo eune imagination débordante, qu in allant raviser dins l' barraque aux chats, j avo trouvé mon bonheur

j' vous explique un tchiot peu la barraque aux chats, chéto eune espèce de barraque qu in savo pu commint qu ale tenno cor debout, faite d' bouts d' bos, d' morciaux d' rals d' berline, tout cha avec des toles qui avotent du et' galvanisées eune trentaine d années en arriere ...

et qui asteure évoluotent dins toutes les couleurs possipes d' la rouille, du brun l' plus clair au brun l' plus foncé ...

va zy pas qu ale dijo m' mère, té pourro attraper le tétanosse ....

ouais mais savez mi j éto intrépite, pi yavo pas d' porte à chte barraque qui éto camuchée bin à l abri au fond du gardin ....

in plus in pouvo y aller discret'mint vu que d'vant yavo du buis et des groseillers à maquereaux ...

donc commint vous dire, quand qu in rintro dins l' barraque , ou plutot dans l antre qu in devro dire, yavo là tous les outils , ou plutot j allo dire toutes les zarmes qui pouvotent servir à un preux chevalier


prennez ch' louchet, quand qu in l' prenno avec l' lame en hauteur, chéto comme eune hallebarte ou eune lance

prenez l' binette ou l' serfouette, cha faijo comme un pic et in éto comme ché guerriers normands

vu qu in plus yavo toudis un viu couverque d' lessiveusse qui traino, cha faijo un véritape bouclier

un historien pourro meme vous dire, nan minloute té faijo pas fausse route, vu que , au moyen ache, au début ché zarmes d' la pietaille, chéto souvint inspiré des outils qui zutilizotent pour travailler dans ché camps

eune faux transformée, cha faijo eune arme , ainsi de suite .....

j arviens à min sujet, y a un coup y avo un épisote d' thibaut et les croisates, du qui yavo un sarazin qui éto costaud et qui utiliso eune espéce d' grosse hache et le héros , thibaud, yavo bin eu du mau à v'nir à bout d' li, dans un combat épique, du qui yavo eu bon nompe d' tapes renversées, d' cayelles coupées in deux , et des lustres qui avotent valdingué à terre ....

j avo bin aimé ch' feuilleton là, et mi, juste aprés j va au gardin, min père i éto pas là, pi d' toute facon j l intindro tourner dins l' rue avec s' carette, que j a été faire un tour dins l' fameusse barraque

et ch est là que j a trouvé ch' fameux grauet, bon pas question d' l utiliser avec un couverque d' lessiveusse, j avo djà du mau à l' brandir à deux mains..

sacré outil , "suffijo" del lever assez haut au d'sus det' tiete et là tel' rabatto d un coup au sol et cha s infonço sec ...

mi savez quand que j' juo , j' juo, et à invoyer l' grauet dinch' sol, ché vrai que cha a causé "queques" dégats dins ché plantations, mais bon j éto persuadé qu en rhabillant cha vite fait en artassant l' terre autour min père i verro rin

sauf que à forche d' juer, j éto pu là, j éto là bo tout là bo en palestine, à combatte ché sarazins, que j a pas intindu l' 204 peugeot d' min père rintrer dins l' rue, ou plutot j' m in su apercu quand que j a intindu l' portiere d' min père claquer pi qui a comminché à m'crier d' sur

faut dire que j' me suis artrouvé d'lèque, avec l' grauet qui dépasso au d'sus dem' tiete et que chéto bin visipe meme del rue ........

j' vous dis pas l' raclée que j a pris, que j éto inconscient , que chéto pas la premiere fo que cha arrivo que j y désobéisso , que j auro pu m'crever un neule , bref, thibaud y a eu caud à ses fesses ch' jur là .....

cor que savez, j éto pas à mon coup d essai, et que quequ' temps avant, j' juo avec l' binette et j avo réussi à casser ch' carreau del barraque au charbon et là djà , j avo archu eune clique

commint vous dire , ché comme cha qu on brise des carrieres d' acteur .........

pauf tiot , comme cha ta loupé d'carrière d'acteur , el pire cha s'rot pour nous in arot pu rin à lire , et pi vu tin grand talent té s'ros pi tête parti in russie
pour ech'grauet ché vrai chétot in otieu formidape , relatifmint dangereux pour chés néophytes , chétot bin pratique pour saquer ché patates , pour ratisser in cassant ches mottes ed' terre , y n'd'avot ed' deux sortes , avec des dints pointues , ech'plus connu , et pi in aute même forme courbée , mais chés dints y s'etotent plus larches din les 2 cms , et ché ch'ti la qui servot pour ratisser et casser chés mottes ed' terre
yetot aussi grammint plus lourd , y pouvot servir aussi a l'occasion pour débrousailler un terrain vague , comme ech'ti qu'yétot au bout d'min gardin quand ch'su arrivé ichi, cha deblaye bin chés ronciers , et in même temps chés orties , cha ma permi ed'm'approcher d'chés arpes et din couper , donc intre parenthesses , ech'grauet y ma servi a m'cauffer aussi

Eh bin, j'va vous dire, mes gins. J'ai bétot 60 ans et j'ai incor... el grauet d'min grinpère!!!...
J'y tiens comme al prunelle ed' mes yeux. Ah, ché dins i sont ugées mais je n'aquatro un neuf pour rin au mond'!!
A chaq'fo que j'min sers, ché min grinpère à qui j'pins...
Cordialmin vot'