16 marches

1 2 3 4 5 6 7 8 9 10 11 12 13 14 15 16 , cha y est in est à l étage
combien d' coups que j a monté et déchindu ch' t escayer ...

d' ailleurs quand que j arveno al' mason, bin d' zannées aprés, j' avo pas b'soin d alleumer ch ' quinquet, pour monter ou pour déchinte, j' faijo cha les ziux freumés

sauf 2 coups ...

eune fo chéto un flime que j avo invie d' vire, min père i ouffe l' porte du couloir et i m appelle, et mi , chéto l époque savez d' mes 16 17 ans, que j' faijo du 48 d' tour d'maronne, que j' chausso djà du 45 , bref " un bio bébé" mais avec à ses pieds, j allo dire des sabots suédois, savez ché sabots in bo, d' couleur noire

min père i appelo cha des galoches, bin ch' coup là j a voulu déchinte vite fait, acoutez j' sais pas commint que j a fait , j a loupé min coup au début , et j a du faire toute l' partie haute jusqu à ch' tournant, debout, mais en glichant presque en skiant sur chaque bout d' marche , pi arrivé ach' tournant, j a queu , ché sabots i sont partis in bas, et mi aprés in roulé boulé

connaissez min père ...j a hérité d' li, tout en patience , jamais soupe au lait... jamais in train d'gueuler, j éto pas cor arrivé in bas que j' l intindo crier "MEEEEERRRTTTE, ASSASSINNNNNN, VA TOUT CASSER CHTI LALE" , et m'mère derriere qu ale arriffe et qu ale deminte quand meme si j avo pas trop d' maux ... brave manman va ....

l' coup aprés ch est arrivé à mi et à min père, savez m' mère l' mason chéto la jungue , yavo des plantes d' partout, des caoutchouc, des fougères, enfin d' toutes sortes

et am' mote qu ale savo pu du les mette et ale a commiché à nin mette dins l' escayer, et somome d' tout cha , ale avo installé ach' coin du tournant , eune espece d' présentoir avec trois pots , qui fallo faire attintion en déchindant

bon mi l' premier à déchinte la nuit sans alleumer, j' l a "invoyé dinguer" in bas, j' m a fait ingueuler par min père, mi j' m a pas laissé faire, chéto l' faute d' em mère cha à mette des chausses trappes , des pieges un peu partout ...

et pas longtimps aprés ch est min père qui a buté d'dins, là y a sorti ch' grand jeu, j' vous zéparne ché gros mots, mais là y a jué l' corte sensipe à la fin en dijant am' mère " mais té veux ma mort" ...

alors ché potées l' lend'main , zont quitté l' escayer ...

16 marches ... 16 marches que j' pourro cor monter les ziux freumés ..