ch'est cor loin ?
par minloute le, 03/02/2013M'man , ch'est cor loin ? ou alors quand que qu on est arrivé ?
les parcours in carette chéto plus long avant qu asteure, d' abord yavo pas tant d 'autoroute, j' me souviens qu in sorto à Arras et que là fallo printe l' route nationale, éviter l agglomération pi faire tous ché viraches qui allotent nous conduire à Souchez, pi enfin sul' route d'Aix Noulette
après bin sur in a eu dro à l autoroute qui allo aller jusqu à calais, avant bin sur in avo eu dro al' fameusse rocate , si meurtriere , qui traversero ch' bassin minier, pour s' terminer , à l époque du coté d' la clarence si j' me trompe te pas
nous in allo quequ' fo vire m' soeur qu ale habito en normandie, et bin avant qui a l autoroute qui permetto d' raccourcir ch' parcours , celle qui veno d' paris , in s'payo l' route nationale ..
montées, déchintes, j intind cor l' bruit pas discret d' l essuie glace such' pare brise
sans compter quand qu in tombo sur un tracteur, ou bin pire et in in voyo souvint, ché fameux camions carqués , blindés à mort de ballots d' lin
j' em demindo toudis commint ché camions là i faijotent pour pas baler dins ché viraches, et quand que min père i arrivo à les doubler, souvint dans eune déchinte, j éto pas trop rassuré quand meme
fallo faire attention aussi yavo cor des passaches à niveau et qu in devo s arreter pour laisser passer ché trains
in s arreto dans des tchiots restaurants d' routiers, du qu in pouvo cor à l époque "apporter son manger", in éto alors assis dans l' premiere salle du qui yavo ch' comptoir, in mingeo not' sandwich et min père i commando eune mousse pour li et j' sais pu qu on quo buvo avec m' mère ....
y a des coups qu on arparto et in artrouvo sul' route un d' ces camions qu in avo djà bin du mau à doubler , que li i s éto pas arrété pour minger et qui éto arpassé d'vant nous ...
sans oublier bin sur, qui yavo pas d' déviations dins ché villes ou ché villaches, j' me souviens d' la longue traversée que ch'éto que d'traverser la ville de Rouen, mais aussi plus au nord, Neufchatel en Bray , du qui yavo toudis des feux rouches interminapes
in passo dans des zindrots que chaque coup j avo dro al' meme reflexion, ouais in passo à Corneville ou pas loin , qui éto dans l' nom d' eune opérette, les cloches de corneville
aprés mi j' guetto ché panneaux kilométriques pour dire à min père l' nompe d' kilometes qui restotent cor pour arriver à destination
quand qu in traverso ché villes, ou meme dans les tchiots hameaux l' long del route nationale, yavo des grantes zaffiches publicitaires, souvint pintes directemint sul' pignon del mason
ichi quand qu in allo vers la normandie, in avo drot souvint au calvados du père magloire, le père magloire i avo d' bonnes joues rouches, am' mote qui devo in pinter des lites d' calva ..et un bonnet comme un bonnet d ' nuit sus' tiete ...
mi j' liso tout haut ché publicités, mais souvint j' ponctuo par " ché cor loin?"
après avec l' temps j arpéro vite fait du qu in éto et c' qui resto à faire
et pi , quand que vraimint j' savo pas quo faire, j' compto ché bornes qui yavo sul' coté del route .....
que d'souvenirs cor din ch't'histoire la , avec mes infants in in parle cor souvint , et y n'da pas un qu'ya oublié , et qu'yé pas prés d'oublier
quand y étotent cor tiots chétot pas un gros problême , j'avos un break R12 , et ch'roulos d'nuit , yavot pas cor chés autoroutes , el peu qu'yavot cha coutot ker , pi j'ai pas ker l'autoroute bref pour ête tranquil
ch'baissos ech'sièche arrière , j'mettos des fins matelas in mousse , et y z'étotent tous les tros allongés,in étos tranquil
pi après j'ai arvindu ech'R12 pour acater un toyota YACE , un tiote camionette vitrée , mais seulemint avec chés deux sièches avant
j'ai été al'casse din l'cote ed' vimy , j'ai racaté des sièches ed' G S , qu'j'ai intallé mi même , mes deux files y dormotent cote à cote , d'su chés sièches dossier abaissés , et ch'garchon tout seul derrière ses soeurs
d'su "l' banquette", et pi l'4eme "bin ouais cha arrif" bin j'avos fait un lit din coffe , avec du quemin d'capes "récupéré au boulot" j'avos mis un tiot matelas d'mousse , et tout l'monte pouvot dormir , sauf mi bin sur , mais j'etos tranquil
( 2 photos)