à vélo à Merlimont 1
par minloute le, 24/07/2013vraimint j a cuji et j' sais pas par quel moyen ch' vélo y a arrivé à Merlimont ..... in tout cas y yéto...
chéto ch' "fameux" vélo d' course que min frère avo bin étrenné , et qui éto pu d' premiere jeunesse, vu qui yavo près d' 14 ans d écart inter min frère et mi
ch'"fameux" vélo d' course, que j a raconté, que j éto contint que j' puisse rouler avec, mais que j avo vite été rafraichi par l' regard dédégneusse d' mes camarates cyclistes quand qui zont vu qui yavo pu d' dérailleur
pour mi chéto pas important, mais à leurs ziux , chéto limite si pouvotent cor m' parler .......
ichi à merlimont, j' connaisso pas personne, et meme si j avo 13 14 ans, cha impécho pas m' mère d' dire " mi j' su pas rassuré que té fasses du vélo ichi" , in in éto arrivé à s' dire que j' pouvo aller à la mer, mais que l' rue principale, la fameusse avenue d' la plage , ale m éto interdite, trop d' circulation, trop d' gins qui traversent sans raviser
à acouter m' mère yauro fallu que j' fache du vélo so à gauche après ch' calvaire, ou tout à fait à droite, du que ch' éto meme pas goudronné, ou alors eune fine couche et pi d' sur du tchiot gravier lanché comme cha , al' va vite ...
in plus merlimont chéto pas comme asteure, so tout goudronné, so avec des bio trottoirs tout parel, nan j' vous parle d' l époque d'la fin des années 60 début 70, avant que cha leur prenne al' municipalité, d' faire comme ailleurs, d uniformiser l' aspect d' la ville
ch' est pour cha que mi, à pas pouvoir rouler avenue d' la plage, cha m inchinto pas, mais savez , fallo indormir m' mère , l' rassurer, qu ale cro que j y va pas ...
j' sorto del mason à pied, min vélo à la main, faut dire aussi que nouzautes qu in habito après ch' garache shell in direction d' merlimont villache , in avo pas d' trottoir du tout , chéto carrémint du sape , meme que chaque année quand que min père i arrivo au chalet, i rintro pas d un coup avec l' carette, fier comme artaban, d'puis l' coup qui avo raclé ch' bas d' caisse , c' qui avo d un coup fait disparaite sin bonheur d arriver chi, et surtout d' li permette d' crier sin fameux "MEEEEERRRRRRRRRRRTTTTE" que nous dins l' carette si in avo pu s incrinquer d un coup inter l'tapis d' sol et pi l' moquette , in l auro fait .....
donc m' vlà, prèt à affronter l' rue et les carettes, comme j' dijo à m' mère " ch est les memes qu à bruay ches gins"
à quo m' mère ale éto pas complet'mint dem' n avis ...
j ' vo j' vo j' parle j' parle mais j a pas cor grimpé such' pédalier d' min vélo, bin mes gins , in f'ra cha d'm ain ....