ch' bidon dins ch' gardin

min père y avo un grand bidon dinch' gardin,j' vous parle d' la fin des années 60, chéto un bidon en ferale

quequ' zannées après, j' me souviens que grinmint d' personnes avotent "récupéré" des grands bidons in plastique bleu, avec des poignées noires, ch éto des gins qui travaillotent à mon chez Ripolin sul' zone d' ruitz qui récupérotent cha et qui les distribuotent à leu vigins


nan du timps que j' vous parle chéto un bidon en ferale, j' m in souviens bien pasque j' avo armarqué que quand que té donno un coup sul' coté d' la tole, selon l' niveau d iau qui yavo d' dins cha faijo pas l' meme son ....

j avo ker buquer tout douch'mint such' coté, pour faire des tchiotes vagues , comme si chéto à la mer .
.....
j avo ker printe un fin bout d' bo pi aller du qui yavo des passaches d' fourmis, foute ch' bout d' bo au miyeu du passache, l arprinte quand qui yavo pas mal d' fourmis d' sur..... pi aller l' déposer dins l iau du bidon

min père i avo pas ker que j' tourne autour d' sin bidon...

j avo dro à "quo qu' té fait là bo", "un gardin ch'est pas un terrain d' ju" " té fait pas des bétisses j espère"

nan nan que j' répondo, j' em promène ...

bin va t' promener dins la rue qui djo min père

faut dire que comme j éto un vrai brizaque, j éto la terreur des plantes du gardin

eune belle fleur d' pivoine ,cor bin freumée, bin ronte, bin jel' coupo, pi cha deveno eune grenate et j' lincho cha dans l' gardin d en face ...

"bin y a pas grinmint d' groseles" qui dijo min père, bin ouais j allo pas li dire que j' juo aux billes avec .....
pi eune fo qui fallo rintrer al' mason, j' les jetto au fond d' la barraque aux chats ..

parel avec l' rhubarpe, drole d' plante que l' rhubarpe, cha pousso d un coup, mi j avo pas ker minger ché tartes à l' rhubarpe

rin qu à sintir l' cuisson, cha m écoeuro, par conte ché tiges rouges, cha faijo eune fo coupées, comme des sabres d' pirates ...

zavez compris la tornade que j éto, bin sur à chaque coup j'em faijo attraper, pasque m' mère ale dijo toudis " TOUT CE SAIT "

cha m inquiéto aussi un peu, comme si ché parints avotent un don d' voyance et pas nous

j' me souviens un coup, j'avo été vraimint commint qu on pourro dire "interdit" d' vire commint que j m éto fait avoir et pourtant j éto sur d' pas pouvoir m' faire printe ...

min père yavo un viu pulvérisateur "flitosque" , enfin j' dijo "flitosque" pasque mi l anglais avant la quatrieme j in avo jamais fait et pour mi "fly tox" mi j' prononcho "flitosque"

alors savez cha m arrivo d' juer dins ch' garage qu in avo au bout du gardin
ouais mes gins in avo eune mason d' corons du qui yavo un garache au bout du gardin , faut dire que l' précédent locataire del mason , juste après la guerre, chéto un commissaire d' police , alors les zouillères i li avotent construit un garache .....

dins ch' fameux garache, yavo d' zétagères, avec bin sur des viezeries ...vu qu' min père i jetto rin ...

et dins ché vieuzeries, yavo ch' fameux pulvérisateur flitosque, in ferale, avec s' forme caractéristique, eune espéce d' tube avec d un coté eune poignée qui faijo piston, et in d' sous du tube à l avant, un réservoir du qu in pouvo y mette du produit cont' ché moustiques ou aut' cosse

ch'éto eune vieuzerie et un coup, min frère , i m a montré quo qu in pouvo in faire et que chéto super rigolo

suffiso d ouvrir ch' bouchon, d' enfoncer l' reservoir dins l iau du bidon, que cha faijo glou glou glou ...

eune fos rempli, t armetto ch' bouchon, et là t ayonno ch' piston, bin mes gins, t avo un sacré jet d iau qui parto d un coup

in plus ch' pulvérisateur, cha arsonno à eune mitraillette pour mi

min père i avo ralé conte min frère en li dijant qui m' montro tout c' qui fallo pas faire, mais bon j' a pu jué pas mal de temps avec ch' pulvérisateur, mais fallo rester dins ch' gardin bin sur

mais voyez , les interdictions, quand qu in est jone, y a un momint, in est tenté d' passer zoute

alors j avo pris ch' pulvérisateur pour aller juer avec mes camarates dins l' pature dins la rue

j avo jué tout tranquil'mint, pas fait d' bétisses, mais j' m a fait printe bet'mint, et j' diro sournois'mint

ch'est eune mère qu ale a v'nu archercher sin fils qu ale a vu que j' juo avec cha

ale a dit que chéto pas prudent d' juer avec cha, qui yavo du produit dangereux, mi pour m' définte j a dis que cha marcho pu et qu' min père i m' l avo donné

j auro du freumer m' gamelle, in tout cas tro quat' jurs après min père éto au courant et ch' pulvérisateur confisqué et y a fini dins l' lessiveusse qui servo d' poubelle

et m' vlà chi , d'vant ch' bidon d iau , à pas pouvoir i juer asteure ...

sauf que un coup, j a eu l intuition... min frère yavo sin vélo qui éto ringé dins l' garache et qui en faijo pu, nan y éto passé au state supérieur, yavo un vélosolex...

et in juant avec l' pompe du vélo, j' m a rindu compte que chéto aussi un systeme d' piston....zavez compris la suite ...

que plaiji d' foute sous l iau l' pompe à vélo, d' sintir l iau mouiller ses manches, bin ouais j arrivo pas à pas mouiller mes manches ....

pi eune fo artirée , j' donno un bon coup d' piston et là parel cha faijo un bio jet dins ch' gardin

j' faijo cha toudis discret' mint jusqu au jur du que j a archu eune clique que j avo pas vu arriver ...

purtant j éto sur d' pas m avoir fait printe, mais voyez , min père en allant dins ch' garache, cha l avo intrigué qui yavo un tchiot peu d eau au pied du vélo, en touchant l' pompe y a vu qu ale éto mouillé...

pi en l' ravisant d un peu plus près , yavu que cha faijo un tchiot momint que j' devo m in servir vu que l intérieur éto tout rouillé

là, m' vlà debout dins l' cuisine, la pompe , l'objet du délit sul' tape, bin voyez en in y busiant bin d' zannées encore, cha pique cor à mes gampes ......

ech bidon pompe à deschinte ché insectes, chéto probablement un collector, mais seulemint in France.
In 1968, j'sus parti faire min service in coopération au Maroc (din un lycée de jeunes filles). Et bin là bo y avo que des pulvérisateurs comme cha, et rien d'aute.
Croyez me j'ai fait comme tout l'monde j'ai été obligé din acater un...
Nan Maurice! pas pour ché jeunes filles, seulemint que pour ché mouques, passeque i a avo des nuages comme ché hannetons din l'Sud.