Gardincour à la mote

j a intindu ch' matin au poste, comme in dijo, que ch't année "moins d un français sur deux est parti en vagances durant juillet et aout" ...

et que ceux qui sont partis , sont partis moins loin et moins longtimps et en cachant des solutions pour que cha coute l' moins cher

in l intindo ch' t expression dins ché corons, "té parti du ti?" et l aute i répondo sérieus'mint "à Gardincour" , quequ' fo en précisant " 8 jurs au gardin, 8 jurs al' cour" .........

mais souvint i précisotent " mais ch' tiot y a parti" , chéto l' plus important , "y a parti en camp à P'tit Fort Philippe"

pour mi qui a eu la chance d' toudis partir en vagances, pi avec mes parints, j' trouvo commint qu in pourro dire, que chéto eune cote mal taillée d invoyer s' garchon , tout seu, in vagances

meme si chéto des vagances, chéto pas avec ses parints

faut dire que j éto tchiot et que j avo pas "saisi" que chéto un bio cadeau qu' ché parints i faijotent à leur infant , qu au moins li, i pourra in profiter ....

mi ch' a m avo interpellé, pasque min camarate qui habito rue d' Denain, i s prénommo Philippe , alors partir en vagances à Ptit Fort Philippe" mi j' pinso que chéto des cacoules

et sans mintir l année après y a cangé d indrot, i éto parti en camp aussi, mais à Grand Fort Philippe .....

chéto des destinations qu in voyo dins ché paches intérieures du jurnal Relais

yavo eune page du qui yavo des photos du qu in voyo ché jones juer au bord d' la mer, pi les différents camps ou colonies qui étotent organisées par ché HBNPC, avec ché tarifs par périotes

yavo aussi sul' meme pache , des photos d' la napoule ou d' menton, j avo ker les raviser , j avo gardé , et j a gardé, un bon souv'nir d' la napoule et pourtant chéto en 1964....

l' pire chéto ceux qui partotent pas du tout, et ch'est sur que quand qu in rintro d' vagances, in avo plein d' histoires à raconter, et les zautes eux, i zavotent rin à raconter ou alors i nous racontotent l' jur qui zavotent été à la mer, et nouzautes qu in éto parti longtimps , on les raillo, en insistant sul' fait que ch'éto qu eune jurnée ..

qu in est con quand qu in est jone .......

mi cha fait eune paire d années que meme si in est au solel, que j' pars in vagances à Gardincour .....

mais m'file ale a parti en vagances ....cha vous rappelle rin mes gins ?