les miyonnaires du dimanche
par minloute le, 30/12/2013
l' diminche in avo m' grand mère à minger, et l' diminche après midi, min père et m' mère allotent es' promener so à ohlain (bin avant qui a eu la construction d'la base de loisirs) ou, si faijo pas si bio, le parcours traditionnel "rue d'la seine, rue d' la loire", ché rues qui yavo à labuissiere, pas loin du carrefour des quat' chemins
mi j' resto souvint al' mason, avec m' grand mère in raviso l' télé, j a des souvenirs d émissions avec les débuts de mirele mathieu et de thierry le luron, tout cha bin sur in noir et blanc
l' diminche après midi, in prenno la vox du nord, y avo eune page complete qui yéto consacrée ach' tiercé, et là avec m' grand mère, in choisisso des numéros, quequ' fos au hasard, quequfos in prenant un favori pi eune paire d' quéveux qui avotent soit eune cote impossipe, cha devo et' sacrés bricoleux, ou alors l' plus souvint , in tout cas pour mi j' choisisso ceux qui avotent les noms les plus farfelus
m' grand mère, ale éto commint dire , sin comportemint yéto à géométrie variape.....
y a des momints chéto "le commandant" chéto sin surnom dins l' famile, ou alors , souvint in tout pitit comité, chéto quéqu un d' gentil
ou tout du moins y avo del complicité, j' me souvins bin qu in prenno plaiji à raviser ensempe , à deux, ch' tiercé, pi les programmes d' variétés comme in dijo à l époque
à l époque du que le mot "variétés" chéto pas en désuétute comme asteure ....
et quand qui yavo des canteux , i n'a certains que j avo ker imiter, tel que Enrico Macias
m' grand mère ale éto bon public, quand que j' imito ch' canteux là, ale rigolo , et cha li cangeo sin visache, in auro dit presque eune tchiote file, avec d' bonne paumettes bin ché ziux presque freumés
souvint ale m appelo "innochint" , mais dans un sens affectueux....
alors mi ya eune canchon que j' connaisso bin ch' refrain chéto "les miyonnaires du dimanche" , ouais j a bin écrit cha pasque in fait j'em moquo d'em grand mère
m' grand mère ale a toudis eu eune drole d' fachon d' prononcer certains mots comme "atelier" ale dijot "ateyier" , "montpellier" ale dijo "montpeyier" , "million" ale dijot "miyon" et bin sur "millionnaire" ...ale dijo "miyionnaire"
ch' est pour cha que quand que Enrico i v'no canter ch'te canchon al' télé mi j' cangeo ché paroles et j' canto "les miyonnaires du dimanche, vont à l ateyier faire la planche,à bruay ou à montpeyier"
alors m' grand mère ale s' rigolo pi ale m attiro à elle pour qu ale m imbrasse bin fort
et quand que mes parints rintrotent, ale cangeo d attitute, ale ardeveno plus froite, pi bientot " Léonce" (min père),"i comminche à faire nuit trouvez pas ?"
chéto signe que m' grand mère ale voulo rintrer rapid'mint as' mason