ch'est afallant
par minloute le, 06/04/2014cha ch'est eune expression que m'mère ale imployo , que j' me souveno pu, et que j a artrouvé hier dins ché mails qu' André i m avo invoyés
ch'est afallant, ah cha quo que j a pu l' intinte quand que j éto tchiot
ch'est afallant, ch'est comme si in dijo "ch'est désolant"
alors mi tout tchiot, j intindo m' mère dire à min père , j' sais pu l' sujet del conversation, mais cha s' termino par "Léonce (chéto l' prénom d' min père) ch'est afallant"
ale accompagno l' phrasse par un hauss'mint des épaules, comme un geste d impuissance
alors j' connaisso la suite, min père i dijo "ODETTTTTTTTE, oh les coeurs !"
alors là ch' scénario y éto écrit, j avo pas ker d ailleurs,
m' mère ale dijo "ah haut les coeurs " ch' est facile à dire et ale brayo un coup
là min père i savo pu du s' mette,i avo pas ker quand que m' mère ale brayo
i essayo d' arrondir ché zangles après , mais y a des coups, l' résultat yéto pire que l' médicamint ...et m'mère ale brayo cor plus
et là vraimint i éto fort imbété, i argretto c' qui avo dit, et i savo pu quo faire
scène d' la vie conjugale qu in diro asteure ....