de d'sous ch' lit, dins l escayer et al' porte du grenier
par minloute le, 12/10/2014in a tous été jone, et quand qu in devo aller s' couquer à l étache, in laissant ché parints in bas, in éto pas si rassuré qu' cha
ch'éto pas leur "d' toute fachon, j' va bintot arriver" , que ch éto d ailleurs pas vrai, mais dit simplemint pasqui voyotent qu in éto pas bin fierot ach' momint là
sur que cha les faijo sourire, à croire qui zavotent pas connu cha quand qui zétotent tchiot, mais mi j éto loin d' faire l' fier à bras
ah j in vo qui dissent "minloute y avo l' drisse" bin pas loin, enfin mi j' sais pas commint chéto chez vous, mais am' mason, quand que j allo m' couquer tout seu in haut, j éto pas seul ...
vous dire que j les ai djà vu, nan , j' peux pas dire, mais savez des fantomes, ch'est rare qui s' montrent comme cha , i préfèrent nous faire peur pour sur'mint qu in les laisse tranquile
eune fos dins min lit, que m'mère ale m avo lu eune derniere histoire, qu ale éto déchindu, qu ale avo éteint ch' quinquet, et arfreumée l' porte in bas , tout douch'mint, i zarrivotent ...
alors chéto pas des grands bruits, nan, plutot des présences qu in arsinto
j' sais pas combien d' coups que j 'pinso qui yen avo un d' camuché sous l'lit, près à m' sauter sul ' guiffe dès que j' comminchero à m indormir
j' do avouer que j m a arlévé plus d un coup pour aller vire, avec m' lampe d' poche, ouais m' mère ale m avo donné cha vu que dans l' noir j éto pas rassuré, plus d un coup j a été vire sous ch' lit ...
mais l' plus souvint j' resto immobile dins min lit, j' voulo meme pon aller vire in d'sous d' ché lattes .....
pi al' reflexion, j' sais pas si chéto eune bonne idée d avoir eune lampe d' poche, vu que , zavez djà vu , quand que vous balayez ché murs ou ché meupes avec cha , cha fait cor plus d ombres bizarres
ché fantomes qui faijotent cor l' plus peur, chéto d' abord chti d' l escayer
ouais , chtilale, j' m éto imaginé que chéto un fantome qui avo eune lonque traine et qui monto l' plus douch'mint possipe ché marches , mais qu in intindo quand meme l' bas d' sin drap qui frotto sur chaque marche quand qui monto
vinguette que j' oso pas non pu trop raviser au fond du couloir ,du qu arrivo la cage d' l escayer, trop peur d' vire sa silhouette tourner au coin ......
l' dernier ou plutot les derniers fantomes , chéto ceux qui étotent au grenier, savez dans eune mason avec du bois, dans l' silence d' la nuit, chaque craqu'mint ou meme eune souris qu ale jouero à l étache su ché planques, bin in l intindo comme si chéto un bruit énorme
donc j éto persuadé qui yavo "du monte" là haut, et quand que j allo m' couquer , j' passo rapid'mint d'vant la porte du grenier
mais y a des jours du que chéto pas d'simples craqu'mints qu in intindo, nan y a des nuits, les nuits d' forts vints, quand qui yavo des rafales qui devrotent s ingouffrer sous ché tuiles, cha faijo comme un courant d air, et savez que les fantomes i zont ker cha les courants d air
et de chte fait, cha faijo vibrer l' porte qui meno au grenier, mi j éto persuadé qui zétotent plusieurs derriere l' porte et qui zéssayottent d' l' ouvrer tout in s arqueboutant d' sus....
faut dire que quand qu in est jone , in a grinmint d imagination....